Եթե 5%-ի վրա եմ աշխատում, ո՞նց 20% հարկ տամ. մեքենաների առքուվաճառքով զբաղվողները բողոքում են (տեսանյութ)

«Ես հարկից չեմ խուսափում և ուզում եմ հարկ տալ, բայց խելամիտ հարկ»: Կառավարության դիմաց իրենց խնդրով Պետական եկամուտների կոմիտեի ներկայացուցչին այդ մասին ասացին մեքենաների առքուվաճառքով զբաղվող վարորդները: Նրանք իրենց դժգոհությունն են հայտնում նոր հարկային պարտավորությունների վերաբերյալ:

Նրանք նկատում են, որ կդադարեն զբաղվել այս գործով, եթե որոշումը չվերանայվի, քանի որ այս կերպ, փաստորեն, եկամուտ չեն ունենում: ՊԵԿ ներկայացուցիչը հարցրեց բողոքող քաղաքացիներին, թե ինչու նրանք չեն աշխատում, որպես անհատ ձեռներեց:

«Էս գործը բոլորն էլ գիտեն՝ ոնց է արվում. եթե ես 5%-ի վրա եմ աշխատում, ես ո՞նց կարող եմ 20% հարկ տալ: Մենք չենք խուսափում օրենքներից, հարկերից, բայց եթե էս գործը մենք ԱՁ-ով անենք, մեքենայի արժեքը նենց գին ա նստում, որ արդեն շուկայի արժեքը բարձրանում է, ու ես չեմ կարողանա էդ մեքենան էդ գնով վաճառեմ, ուզենամ էլ՝ չեմ կարա... մի տարի պետք ա սպասեմ, իսկ մեքենայի գինն ընկնում ա էդ ընթացքում»,-ասաց ցուցարարներից մի երիտասարդ:

Հավաքվածները նկատեցին, որ իրենց պահանջը, խնդրանքն այն է, որ ֆիքսված թիվ լինի, որը պետք է վճարեն: Հավաքվածներից մեկը բերեց Վրաստանի օրինակը. «Մենք ուզում ենք, Վրաստանի նման, մեքենան բերենք մեր անունով՝ տասը հատ կլինի, հինգ, թե քսան, դրանից պետությունը միայն կշահի: Ես չգնամ ուրիշի անունով փաստաթուղթ բերեմ, որ հարկ չմուծեմ: Ֆիքսված գումար ձևակերպեք ամեն մեքենայի համար, մենք բերենք՝ մուծենք: Ոչ մի խնդիր չունենք»:

ՊԵԿ ներկայացուցիչն ի պատասխան առաջարկեց պահանջը ձևակերպել ու փոխանցել իրենց, որպեսզի կառավարությունում քննարկեն:

Մանրամասները՝ տեսանյութում