Ինչո՞ւ է աղմկում Մարուքյանը

Ազգային ժողով անցած ուժերը, դեռ խորհրդարան չմտած, իրենց բան ու գործը թողել ու իրար հակահարվածներ են հասցնում՝ փորձելով հասարակությանն ապացուցել ու իրենք իրենց համոզել, որ մեկը մյուսից ավելի ընդդիմադիր է:

Սա ցավալի, բայց կանխատեսելի իրավիճակ էր...

«Լուսավոր Հայաստան» կուսակցության նախագահ Էդմոն Մարուքյանն իրար է խառնվել: Նրան վրդովել են իր մասին հնչեցվող  գնահատականներին առ այն, որ նա «Սերժ Սարգսյանի հաճախորդն է», «չստացված քաղաքական գործիչ է», «Միշիկի պրոյեկտն է» (Միշիկը Միքայել Մինասյանն է՝ Սերժ Սարգսյանի փեսան), որ «կեղծ ընդդիմություն է» և այլն, այլն...

Նրան գուցե այդչափ չմտահոգեին այս «մեղադրանքները», եթե դրանց մի մասի հեղինակը ԲՀԿ-ն չլիներ, այսինքն՝ ուժ, որ սպառնում է  խորհրդարանում դառնալ ԼՀԿ-ի մրցակիցը:

Կարճ ասած՝ խոսքի տակ չմնալու և երևի թե նաև իր ընտրազանգվածին համոզելու համար, որ ինքն արդար, ազնիվ ու մաքուր է, Մարուքյանը որոշել է ֆեյսբուքյան իր էջով պատասխանել հնչեցված հայտարարություններին:

Մեր մեջ ասած՝ ավելի լավ էր՝ լռեր կամ գոնե պատասխաներ մեկ նախադասությամբ, որ ինքը չի պատրաստվում արձագանքել հերյուրանքերին և գործով կապացուցի, թե ով է ինքը: Բայց մյուս կողմից էլ թերևս հասկացել է, որ գործով շատ բան ապացուցել չի կարող, քան կրկին փաստել այն, ինչ արդեն հնչեցվել է իր մասին:

Էդմոն Մարուքյանը, խառնված ու արդեն չհետևելով Լոռու բարբառին, նշեց, որ ԲՀԿ-ն ու Գագիկ Ծառուկյանն այդքան չկան, որ իրեն կա՛մ սպառնան, կա՛մ մեղադրեն ինչ-որ բաներում և, առհասարակ, ինքն իր բան ու գործը չի թողնելու և արձագանքի ԲՀԿ-ին: Ու չնայած այս հայտարարությանը՝ նա ամբողջ 43 րոպե ասում էր ու քարկոծում, քարկոծում էր ու ասում և փորձում բոլորին վստահեցնել ու ինքն իրեն համոզել, որ սպառնալիքներից չի վախենում, և որ իրենց կուսակցությունը չի «մեռնի» և մեղմ ասած, կաշվից դուրս էր գալիս համոզելու, թե ինքը «հետագիծ» ունի...

Իհարկե, հետագիծ ունեն բոլորը, հարցն այն է, թե ինչպիսի՞ն է այդ հետագիծն ու չի՞ ցեխոտվել այն արդյոք... ասենք,օրինակ՝ հարդագողի թողած հետքը ևս հետագիծ էր։

Որպեսզի կրկնված չլինենք, և ինչպես Մարուքյանն է ասում, ավելորդ ժամանակ չվատնենք, չենք փորձի նորից անդրադառնալ, թե ինչպես, ինչու և ում օգնությամբ Մարուքյան Էդմոնը դարձավ պատգամավոր Էդմոն Մարուքյան...

Փաստն այն է, որ Վանաձորի քաղաքապետի ընտրություններից մնացած ոսկորը դեռ Մարուքյանի կոկորդին կանգնած է, որ վանաձորցիներն այնքան էլ չեն սիրում նրան, ինչպես ինքն է պատկերացնում կամ ներկայացնում, որ բոլորն արդեն հասկացել են, թե ինչպիսին է նրա թողած հետագիծը  ու նա բացահայտվել է ամենաուղիղ իմաստով, և իբր քիչ էր այս ամենը, Ծառուկյանի հետ դեբատն էլ նոր փակագծեր բացեց։ Մի խոսքով՝ Մարուքյանն իսկապես քաղաքական դաշտում սպառել է իրեն, իսկ ավելի կոնկրետ՝ հավատ չի ներշնչում հասարակության շրջանում․․․

Նա վրդովվել է, քանի որ ինչ-որ տեղ ձախողել է, ինչ-որ տեղ՝ տանուլ տվել: Եվ հիմա, փոխանակ գործով ապացուցի, որ բոլորը սխալ էին ու ինքը ճիշտ ու ինքն իր թիմով իսկապես ընդդիմադիր է, նա պարզապես բորբոքված հայտարարում է, թե  իրենք ծախված չեն, պապաներ չունեն. «Ասում են՝ ԼՀԿ պապաները.... ա էդ ի՞նչ տերմին ա, որ օգտագործում եք.... Սերժիկը, Միշիկը, Սաշիկը, Ռոբիկը, Գևորիկը ոչ  ոք չեն օգնել ու չեն էլ կարող օգնել... հո անկապ խոսալո՞վ չի...»...

Միաժամանակ նա ասում է, թե իր հետ գործ ունեցողները չգիտեն, թե ում հետ են գործ բռնել. «Ա էդ ո՞ւմ եք սպառընմ, գոնե դուք գիտե՞ք, թե ո՞ւմ դեմ եք դուրս եկել...»:

Այլ կերպ ասած՝ իր դեմ ուղղված հայտարարություններին հակադարձելու փոխարեն, իր 43 րոպե տևողությամբ ելույթով Մարուքյանը կրկին փաստեց, որ ինչ ասում են, ճիշտ են ասում: Մի հարցնող լինի, եթե արդար ես ու իրական ընդդիմություն՝ ինչո՞ւ ես բորբոքվել, ինչո՞ւ ես այդպես խառնվել, ի՞նչ է պատահել՝ ապացուցիր գործով, որ դու ճիշտ ես, թե՞ արդեն, ինչպես ասում են՝  «բանը բանից անցել է...», ու բոլորը գիտեն, որ ինչպես գրպանային ընդդիմություն եղել ես նախորդների ժամանակ, այնպես էլ մնալու ես այդպիսին․․․ 

Ի դեպ՝ նա իր ելույթի մեջ մի պահ հիշեցրեց նաև հայտնի «Գնդիկ բոքոնիկի» հեքիաթը՝ թե «Ես Սերժից չեմ վախեցել, Ռոբից չեմ վախեցել, ձեզնից ինչո՞ւ պետք է վախենամ»... բա էլ ինչո՞ւ է զուր աղմկում․․․

Իրականում Մարուքյանը շատ լավ գիտի, որ հենց Գնդիկ բոքոնիկի ճակատագրին է արժանանալու՝ երգելով գլորվելու է և, ձեռքից ձեռք անցնելով, ի վերջո հայտնվելու է աղվեսի ստամոքսում...

NEWSPRESS.am