Դոզավորված նպատակով շանտաժ է, շորթում և ահաբեկչություն․ Զեյնալյանը՝ գաղտնալսման մասին

Այս կառավարության գործունեության ընթացքում Արդարադատության նախարարը որևէ դատավորի որևէ հրահանգ չի տվել։ Այդ մասին լրագրողների հետ զրույցում հայտարարեց ՀՀ արդարադատության նախարարի ժ/պ Արտակ Զեյնալյանը՝ անդրադառնալով ԱԱԾ, ՀՔԾ ղեկավարների և վարչապետի ժ/պ Նիկոլ Փաշինյանի գաղտնալսված հեռախոսազրույցին։

«Ես չեմ ուզում քննարկման առարկա դարձնել ձայնագրությունները: Դրանք կատարվել են կոնկրետ դոզավորված նպատակով և դա շանտաժ է, դա շորթում է, դա ահաբեկչություն է։ Եվ եթե մենք տուրք տանք գայթակղությանն ու քննարկման առարկա դարձնենք դրանց բովանդակությունը, մենք շատ փխրուն իրավունքի նկատմամբ իրականացնում ենք ոտնձգություն ու ինքներս դառնում ենք դրա գործիքները»,- ասաց Արտակ Զեյնալյանը։

Նրա խոսքով` հաղորդակցության գաղտնիության իրավունքը խոցելի իրավունք է ներկայիս տեխնիկայի դարում։

«Եթե մենք քննարկենք այդ խոսակցությունների բովանդակությունը, մենք կդառնանք այդ իրավունքի նկատմամբ ոտնձգություն արած մարդկանց խմբերի գործիքը։ Այդպիսի միջամտություն կարող է անել բացառապես պետությունը, բացառապես դատարանի դատական ակտի հիման վրա, և օրենքով սահմանված կարգով այդ միջամտությունը պետք է հետապնդի իրավաչափ նպատակ և լինի անհրաժեշտ ժողովրդավարական հասարակարգում։ Դա չափազանց վտանգավոր միջամտություն է։ Մենք բոլորս դրա պոտենցիալ զոհերն ենք, քանի դեռ չի բացահայտվել այդ խումբը, կամ այդ անձը ու չի ենթարկվել պատասխանատվության»,- նշեց նախարարը։

Նա լրագրողներին կոչ արեց խորամուխ չլինել ձայնագրության բովանդակության մեջ։ Զեյնալյանը նշեց նաև, որ դատական համակարգը բարելավվել է և ավելի անկախ է դարձել այն է, իսկ որպես իր խոսքի երաշխիք վկայակոչեց այն, որ պետական մարմինները դատարաններում պարտվում են:

«Նորմալ է, որ պետական մարմինները դատարաններում պարտվում են։ Դատարանը անկախ է, և կարող են նրա ընդունած որոշ ակտեր չգոհացնել պետական մարմիններին»։