Ես չեմ ասել՝ տարօրինակ, ասել եմ՝ հետաքրքիր․ ես տարօրինակը դրա մասին չեմ ասել․ Արայիկ Հարությունյանը փորձում էր հերքել

«Ես ասել եմ ո՛չ թե տարօրինակ, այլ հետաքրքիր»։ Այսպես արձագանքեց ՀՀ կրթության և գիտության նախարարի ժ/պ Արայիկ Հարությունյանը վարչապետի ժ/պ Նիկոլ Փաշինյանի նոր խորհրդական Արշակ Կարապետյանի մասին նախկինում իր արած դիտարկումներին, թե ինքը տարօրինակ է համարել, որ Արշակ Կարապետյանը Մոսկվայում ՀՀ դեսպանատանն աշխատում է որպես ռազմական կցորդ:

Սկզբում նա բացատրեց, որ ասել է, ո՛չ թե տարօրինակ, այլ հետաքրքիր, և խորհուրդ տվեց կարդալ իր դուրս գրած տեքստը, որից հետո լրագրողների մեջբերումից հետո, Հարությունյանը նկատեց, որ իր ասած տարօրինակն այլ երևույթի էր վերաբերում։

«Եթե տեսանյութն ամբողջությամբ եք նայել, ես տարօրինակ չեմ համարել դա, ես տարօրինակ եմ համարել, որ ապրիլյան դեպքերի հետ կապված որևէ մեկը չի պատժվել: Ես դա ներկայացրել եմ որպես հետաքրքիր տեղեկություն», - ասաց Հարությունյանը:

Դիտարկմանը, թե չի՞ տեսնում հակասություն նախկինում Կարապետյանի մասին իր արած հայտարարությունների և նրա ներկայիս նշանակման հետ, նախարարի պաշտոնակատարն ընդգծեց, որ հարցին երեկ անդրադարձել է վարչապետի պաշտոնակատարը, և իրեն բավարարել է Փաշինյանի պատասխանը: 

Հիշեցնենք, որ Փաշինյանը նշել էր, թե Արշակ Կարապետյանին ինքն է նշանակել և համոզված է, որ նա իր պարտականությունները կկատարի: 

Այս նշանակումից հետո էլ համացանցում տեսանյութ էր հրապարակվել, որտեղ Արայիկ Հարությունյանը Նիկոլ Փաշինյանի ու Տիգրան Ավինյանի հետ խոսում է Զինված ուժերի գլխավոր շտաբի հետախուզության վարչության նախկին պետ Արշակ Կարապետյանի մասին։