Եթե Փաշինյանը չգա մեզ մոտ, մենք կգնանք իր մոտ՝ սիրո և հանդուրժողականության ներքո․ Մշակույթի նախարարությունը լուծարվում է

ՀՀ վարչապետի ժ/պ Նիկոլ Փաշինյանի որոշմամբ` Մշակույթի նախարարության մի մասն անցնում է քաղաքաշինության գործառույթ, մյուս մասը՝ կրթության, իսկ նախարարության աշխատակիցները մնում են առանց աշխատանքի։

Այդ մասին նրանք իմացել են երեկ՝ դեկտեմբերի 20-ին, Փաշինյանի հայտարարության ժամանակ։

«Նոր տարվա շեմին մեզ անակնկալ մատուցեցին։ Էդ ո՞նց են որոշել, որ Մշակույթի նախարարությունը պետք է վերանա»,-լրագրողների հետ զրույցում վրդովված ասացին նախարարության աշխատակիցները։

Նրանք նկատեցին, որ 30-40 տարվա աշխատակիցներ ունեն, որոնցից ոչ մեկը կառչած չէ իր պաշտոնից, խնդիրն այստեղ այլ է․

«Չերչիլն էր ասում՝ եթե ուզում եք վերացնել մի ժողովրդի՝ վերացրեք նրա մշակույթը․․․ ինչպես պաշտպանության նախարարությունը, այնպես էլ մշակույթի նախարարությունը ռազմավարական նշանակություն ունի, քանի որ երկիրը պահում է մշակույթը»,- ասացին բողոքողները։

Նրանք համաձայն չեն այն մտքին, որ այս եղանակով հնարավոր է կառավարումն արդյունավետ դարձնել։ Նրանց դիտարկմամբ՝ չկան ուսումնասիրություններ, որոնց արդյունքում պարզվել է, թե մի ամբողջ համակարգի, այն էլ նման կարևորության համակարգի օպտիմալացումը, կառավարումը դարձնում է արդյունավետ։

«Մշակութային ժառանգությունը մի ամբողջություն է և դրանք բոլորը միասնական են հանդես գալիս, դրանք առանձնացնել ու տալ տարբեր նախարարությունների՝ սխալ է։ Ինչպես են պատկերացնում, օրինակ, հուշարձանների պահպանումը կամ թատրոնը հանձնել կրթության նախարարությանը»,-ասացին աշխատակիցները։

Նրանք նկատում են նաև, որ եթե կան «միայն սուրճ խմելու համար փող ստացողներ», ինչպես պատճառաբանում են օպտիմալացումը, ապա հաստատ դա իրենց նախարարությունում չէ։

«Մշակույթի նախարարությունը մշտապես դեմ է եղել ու պայքարել է որևէ մշակութային արժեքի քանդմանը։ Մեզ պետք է ո՛չ թե լուծարել, այլ հզորացնել, որպեսզի կարողանանք նաև վճռական որոշումներ կայացնել և թույլ չտալ ապօրինություններին»,-ասացին նրանք։

Նախարարության աշխատակիցները վստահեցնում են, որ եթե վարչապետը չուզի իրենց մոտ գալ, ապա իրենք նրա մոտ կգնան՝ սիրո և հանդուրժողականության ներքո․․․