«ՀՀ-ում մշակութային ժառանգությունն աղճատվում է»․ մասնագետ

Որևէ վերլուծություն չկա, թե ինչ անարդյունավետ գործոններ են հայտնաբերել, որի արդյունքում նպատակահարմար է մշակույթի նախարարությունը միացել այլ գերատեսչության։

Լրագրողնորի հետ հանդիպմանն իր մտահոգությունը հայտնեց Մշակութային ժառանգության և ժողովրդական արհեստների վարչության պետի տեղակալ Երանուհի Մարգարյանը։

«Այսօր շրջանառվում է անկատար, սխալ, ոչ գրագետ ձևակերպումներով իրավական ակտ, որտեղ ընդամենը նշված է, որ իրենց քայլն արվում է արդյունավետությունը բարձրացնելու համար։ Հիմա ուզում ենք իմանալ՝ ինչ վերլուծությունների հիման վրա է սխալ կառավարման երևույթներ հայտնաբերվել, որ նման որոշում է կայացել»,-ասաց Երանուհի Մարգարյանը։

Նրա դիտարկմամբ՝ ցանկացած իրավական ակտ շրջանառելուց առաջ լայն հանրային քննարկումների փուլ պետք է անցի։ Մինչդեռ այս նախագիծը շրջանառվել է և՛ օրենքի լուրջ խախտումներով, և՛ կառավարության ընդունած իրավական ակտերի խախտումերով ու չի անցել հանրային քննարկում։

«Ես մտահոգություն ունեմ, որ այս նախագծով Հայաստանում մշակութային ժառանգությունն աղճատվում է»,- ասաց Մշակույթի նախարարության ներկայացուցիչը։

Ասուլիսին ներկա Կառավարման փորձագետ Սերոբ Անտինյանն էլ նկատեց, որ Մշակույթի նախարարությանը պետք է տրվի հզոր, իրավական լծակներ, վերահսկողական լծակներ ու շատ խոր մասնագիտական վերլուծություններ պետք է արվեն։

«Հայաստանը 3000-4000-ամյա մշակութային ժառանագության ունի, պահպանման, պաշտպանության, հանրահռչակման գործունեությունը լիարժեք իրականացնելու համար: Հայաստանը ճյուղային, առանձին գերատեսչության կարիք ունի, պետական կառավարման համակարգի տրամաբանությունն ասում է, որ յուրաքանչուր ոլորտի համար ճյուղային նախարարությունը կարող է ռազմավարություն մշակել։ Կրթության և գիտության նախարարության կազմում գտնվող վարչությունը չունի նման իրավասություն»,- նշեց նա։

Ինչ վերաբերում է նրան, որ պատմամշակութային անշարժ հուշարձանների բնագավառը տրվում է քաղաքաշինության կոմիտեին, ապա մասնագետը նկատում է, որ իրենք տարիներ շարունակ պայքարել են հենց դրա դեմ, որ նման բան տեղի չունենա։

«Կոմիտեներն ընդհանրապես քաղաքականության մշակող մարմիններ չեն, նաև միջազգային կոնվենցիաներով են այս բնագավառում խնդիրներ ունենալու»,-ասաց Սերոբ Անտինյանը։