Ի գործ․ Փաշինյանին ծանր բանակցություններ են սպասվում

Այս շաբաթ՝ դեկտեմբերի 27-ին, վարչապետի պաշտոնակատար Նիկոլ Փաշինյանը Մոսկվայում աշխատանքային հանդիպում կունենա Ռուսաստանի նախագահ Վլադիմիր Պուտինի հետ․ թե ինչ է նախատեսված երկու երկրների աշխատանքային օրակարգում, հայտնի չէ, իսկ թե որն է հայաստանյան օրակարգի ամենակարևոր թեման, հայկական կողմի համար ակնհայտ է․ Նիկոլ Փաշինյանից հասարակությունը պահանջում է ռուսական կողմի հետ հստակեցնել՝ գազի գնի շուրջ բանակցություններն ի՞նչ փուլում են և ե՞րբ կավարտվեն, իրանական կողմից գազ գնելու վերաբերյալ դիրքորոշումներն ինչպիսի՞ն են։

Նիկոլ Փաշինյանը սեղանին պետք է դնի նաև ռուսական գազի գինը սահմանին 1000 խմ-ի դիմաց՝ 215 դոլար դարձնելու մասին խոսակցությունները՝ դրանք պաշտոնապես կա՛մ հերքելու, կա՛մ հաստատելու համար։

Քանի որ վարչապետի պաշտոնակատարը արդեն իսկ մի քանի անգամ հայտարարել է, որ հայ-ռուսական հարաբերությունները երբեք այնքան բարձր մակարդակի վրա չեն եղել, որքան այսօր, ուստի՝ հասարակությունը պահանջում է կանխել գազի գնի թանկացումը՝ անգամ մեկ դոլարով։ 

Ժամանակն է, որ Նիկոլ Փաշինյանն անի այն, ինչի մեջ մշտապես, որպես ընդդիմադիր պատգամավոր, քննադատել է նախկին իշխանություններին․ նա մեղադրում էր Սերժ Սարգսյանին՝ հլու հնազանդ Պուտինին ծառայելու և հայաստանյան շահը՝ ռուսաստանյան շահին ստորադասելու համար և հիմա ժամանակն է՝ խոսքից գործին անցնելու։

Հայ հասարակությանը հուզող հաջորդ կարևոր թեման, որը տարբերվում է սոցիալականից՝ գազի գնից, բայց իր կարևորությամբ չի զիջում դրան՝ անվտանգության հարցն է և ՀԱՊԿ գլխավոր քարտուղարի շուրջ ստեղծված իրավիճակը։

Թեև ամեն անգամ լրատվամիջոցների հետ հանդիպումների ժամանակ Փաշինյանը պահը բաց չի թողնում՝ հայտարարելու և հանգստացնելու բոլորին, որ ՀԱՊԿ գլխավոր քարտուղարի հարցը անցողիկ և է և ոչ կարևոր, սակայն Արցախյան հիմնախնդրի առաջ կանգնած Հայաստանի և Արցախի սթափ և ադեկվատ հատվածը շատ լավ է գիտակցում ՀԱՊԿ գլխավոր քարտուղարի կարևորությունն ու դրա պաշտոնում ադրբեջանամետ բելառուսցի ներկայացուցիչ ունենալու վտանգը։

ՀԱՊԿ գլխավոր քարտուղարի պոստն արդեն իսկ կորցրած Նիկոլ Փաշինյանը ռուսական կողմից պետք է բերի նվազագույնը՝ սպառազինությունը ներքին գներով վաճառելու ռուսական կողմի համաձայնությունը և Ադրբեջանին ռուսական սպառազինության մատակարարման չափավորում։

Այնպես որ, Փաշինյանին այս անգամ սպասվում են ծանր բանակցություններ, իսկ հասարակությունը սպասում է ոչ թե պոպուլիստ դուխով հայտարարություններ, այլ գործ։

NEWSPRESS.am