Կարևորը կոստյումն է. մնացյալ ամեն ինչ անցողիկ է

Այսօր հրապարակվեց «Կառավարության կառուցվածքի և գործունեության մասին» օրենքում փոփոխություններ և լրացումներ կատարելու մասին» օրենքի նախագիծը, որով նախատեսվում է 17 նախարարությունների փոխարեն ունենալ 12-ը:

Նոր կառավարությունը կազմված է լինելու վարչապետից, երկու փոխվարչապետից և նախարարներից:

Նախագծով նախատեսվում է ունենալ հետևյալ նախարարությունները՝

Աշխատանքի և սոցիալական հարցերի նախարարություն, 

Առողջապահության նախարարություն,

Արդարադատության նախարարություն,

Արտակարգ իրավիճակների նախարարություն,

Արտաքին գործերի նախարարություն,

Բնապահպանության նախարարություն,

Կրթության, գիտության, մշակույթի և սպորտի նախարարություն,

Պաշտպանության նախարարություն,

Տարածքային կառավարման և ենթակառուցվածքների նախարարություն,

Բարձր տեխնոլոգիաների և ռազմարդյունաբերության նախարարություն, 

Տնտեսական զարգացման և գյուղատնտեսության նախարարություն, 

Ֆինանսների նախարարություն:

Փաստորեն, կառուցվածքային փոփոխություններ անելիս ուժային կառույցները՝ ոստիկանությունը և ԱԱԾ-ն, շարունակում են մնալ վարչապետի վերահսկողության ներքո՝ չնայած վարչապետի քաղաքական թիմը՝ ԵԼՔ դաշինքը, նախկինում խոսել է այդ մարմինները վարչապետի վերահսկողությունից Ազգային ժողովի վերահսկողությանը հանձնելու մասին։

Փաստորեն, Նիկոլ Փաշինյանի կառավարությունը կառուցվածքային փոփոխություններ է կատարում օպտիմալացման անվան տակ, աշխատանքից ազատում հազարավոր մարդկանց, սակայն որևէ փոփոխություն չի կատարում սուպերվարչապետի կոստյումից հրաժարվելու համար։

Սա հերթական անգամ փաստում է այս Կառավարության՝ մի բան ասելու և այլ բան անելու քաղաքականության մասին, որի դրսևորումներն օր օրի ավելի ակնառու են դառնում։

Նշենք, որ թեև Կառավարության ղեկավարից բազմիցս հնչել է կադրային ջարդ չանելու խոստումներ, սակայն արդեն իսկ վարչությունների վերածված նախարարության աշխատակիցներն ահազանգում են, որ աշխատանքից ազատվում են իրենց ոլորտների բացառիկ մասնագետները:

Նախարարությունների միացման արդյունքում աշխատանքից կազատվեն մասնագետ կադրեր՝ քաղծառայողներ, բանիմաց մարդիկ։

Իսկ թե նախարարությունների օպտիմալացման ծրագիրը կտրուկ ու շուտափույթ եղանակով իրականացնելը հավելյալ էլ ինչ վտանգներ կծնի գործազրկությանը նոր թափ տալուց բացի, ականատես կլինենք առաջիկայում։

NEWSPRESS.am