Քուանշ, պարո՛ն քաղաքապետ․ անցանկալի է լինելու, եթե տարեվերջին քաղաքի խնդիրները վերագրեմ Ձեր ստացած աշխատավարձին․ Խաժակյան

Այսօր Երևանի ավագանու նիստում ԲՀԿ խմբակցության ղեկավար Արման Աբովյանը հարց ուղղեց քաղաքապետին, թե տրանսպորտի նոր ծանցի ներդրման համար բրիտանական WYG կազմակերպությանը տրամադրված մոտ 850 հազար դոլարը գնալու է ջո՞ւրը ընկնի: Արձագանքելով նրան՝ քաղաքապետ Հայկ Մարությանը նկատեց, որ պետք է պարզվի, թե ում մեղավորությունն է՝ քաղաքապետարանի՞, թե՞ այդ կազմակերպության, որպեսզի համապատասխան քայլեր ձեռնարկեն։

Նա դարձյալ նկատեց, որ տրանսպորտային ցանցի ամբողջական փոփոխման համար առնվազն 2 տարի է պետք: Ապա դիմելով իրեն քննադատող «Լույս» խմբակցության անդամներին, որոնք ավագանու անդամ են եղել նաև նախորդ ավագանիում՝ ասաց. «Դուք այն ժամանակ եղել եք ավագանու անդամներ, 55 հազար դրամ աշխատավարձ եք ստացել, եղել եք անցած ավագանու անդամներ և ոչ մի բան չեք արել, որովհետև այսօր ունենք պրոբլեմատիկ զեկույց: Ձեր այդ հանձնաժողովն անգործության է մատնված եղել, որովհետև այն զեկույցը, որ բերել են մեզ, ես համարում եմ անբավարար: Դուք պիտի ավելի շատ ու ավելի ճիշտ աշխատեիք իրենց հետ: Այդ դեպքում միգուցե այսօր կարողանայինք տրանսպորտային նոր ցանցի ներդրման գործընթացն սկսել»։

Հայկ Մարությանի պատասխանը վրդովեցրեց «Լույս» խմբակցության ղեկավար Դավիթ Խաժակյանին։ Վերջինս արձագանքեց. «Քուանշ, պարո՛ն քաղաքապետ: Պատրաստ եմ ցանկացածի հետ քննարկել, բանավիճել, թող որևէ մեկն ասի՝ այ էս բանն էստեղ լավ չեք արել: Մյուս կողմից՝ ձեր համար շատ անցանկալի է լինելու, եթե տարեվերջին քաղաքի խնդիրները վերագրեմ ձեր ստացած աշխատավարձին: Դա ի՞նչ ասելու բան է, դա լավ գործելաոճ չի»: