«Վստրեչի ապերի» գործով տուժողի հայրը «զակա՞զ» է կատարում

Մամուլում շրջանառվում է Վստրեչի Ապեր մանկանվամբ Արամ Վարդանյանի գործով տուժածի հոր՝ Սուրեն Զոհրաբյանի տեսանյութը, որտեղ նա միջադեպի մասին «մանրամասներ» է ներկայացնում։

Անկեղծ լինելու համար պետք է նշենք, որ նրա տղայի համար ավելի լավ կլիներ, որ իր հայրը չաներ դա։ Տուժող Մամիկոն Բագրատունու հայրը հպարտությամբ պատմում է, թե ինչպես են երկու աղջիկ եկել իր «տղային ուզելու»։ Նրա այս հայտարարության առաջին րոպեներին մտածում ես, թե հայրը հումոր է անում, հետո պարզվում է, որ ո՛չ, հայ տղամարդը առանց քաշվելու պատմում է․

«2012 թվականին Բարխոյան Արմինեն և Այվազյան Նարինեն եկան իմ տղային ուզելու Նարինեի համար․․․ վերջը եկան՝ ծանոթացանք․․․»։

Հայրը պատմում է, թե ինչպես է գովել տղային, թե «վրան մեղր է քսած», իսկ ապագա զոքանչը՝ Արմինեն էլ սպառնացել է, թե չի ների տղային, եթե դավաճանի իր աղջկան․

«Արմինեն ասեց՝ դավաճանի՞ իմ աղջկան, ոտերը ջարդելու եմ, շալվարը հագից կհանեմ, կվտարեմ ստեղից»․․․

Ամեն դեպքում, հայրը համաձայնել է և կնության է տվել իր որդուն․․․

Այսօր արդեն հայրը պատմում է, թե Նարինեի ու Արմինեի «զակազ»-ով, 2017 թվականին, տղայի ամուսնալուծությունց հետո, Վստրեչի ապերը ծեծի է ենթարկել իր տղային՝ ճիշտ Արմինեի նկարագրած ձևով․

«Տարել են, ծեծել են, շալվարը հանել են, նկարել, ուղարկել Արմինեին․․․»

Այս պատմությունն իսկապես մի տեսակ շինծու և անիրական է թվում, քանի որ ոչ մի հայ տղամարդ, ոչ մի պարագայում ի ցույց աշխարհի, իր տղային այդչափ չէր նսեմացնի՝ պատմելով կանանց կողմից ոտնահարված իր տղայի արժանապատվության մասին։

Ու այստեղ, երբ հայրը խոսում է «զակազ»-ից, հարց է առաջանում, թե արդյոք ո՞ւմ  «զակազ»-ն է կատարում ինքը, և ինչի՞ դիմաց, որ այդչափ ստորացնում է իր տղային։

Եթե իհարկե նման դեպք տեղի է ունեցել, ապա հայրը պետք է լռություն պահպաներ․ ի վերջո դատական նիստերը դռնփակ են, և ոչ ոք չէր իմանա, որ նրա տղային երկու կին խնամախոսության են գնացել, իսկ հետո ստորացրել։ Չէ՞ր մտածում հայրը, թե ինչպես է հետո իր տղան երևալու ընկերների մեջ (եթե իհարկե նման թույլ տղամարդը կարող է ունենալ ընկերներ)։

Մյուս կողմից էլ, եթե իսկապես սա ճշմարտություն է, ապա ինչո՞ւ հայրը մեկ տարի առաջ չէր բարձրաձայնում։ Արդարացումները, թե մինչ հեղափոխությունը չէր կարողանում խոսել այդ մասին, քանի որ վախենում էր՝ արդարացի չեն․ իսկ ի՞նչ կար ավելի թանկ բան աշխարհում, քան թեկուզ կյանքի գնով իր տղայի պատիվն ու արժանապատվությունը փրկելը։

Իսկ այսօր արդեն հայրը չի՞ վախենում, որ ինքն իր ձեռքով իր տղայի պատիվը գետնով տվեց ու ստորացրեց նրան՝ իր պատմությամբ։

Այս պատմությունն իսկապես ծաղր է ցանկացած հայ տղամարդու համար, ով կարողանում է ճիշտ գնահատել տղամարդու արժանապատվությունները։ Հայրը փաստացի ոչնչացրեց իր տղային՝ չգիտես ինչի դիմաց։ Երևի թե այն բանի, որ ինչ-որ մեկի մտքով անցել է Վստրեչի Ապերի դեմ քրգործ հարուցել․․․

Բացի այդ, հետաքրքիր է նաև, թե ինչո՞ւ իրավապահների մտքով չի անցնում պարզել, կամ նույն ոգևորությամբ հրապարակել, թե ինչո՞ւ է Մամիկոն Բագրատունին փոխել իր ազգանունը, ի՞նչն է դրդել նրան անել դա։

Ի դեպ, մեզ հասած տեղեկությունների համաձայն՝ հեղափոխական շարժման առաջին օրերին Նիկոլ Փաշինյանին գովերգող Բագրատունին, այժմ նեղ շրջանակներում հայհոյում է նրան, թե ակնկալիքները չարդարացրեց։ Եթե այդպես է, ապա ինչո՞ւ է նրա հայրը գործի հետ կապված շահարկում հեղափոխությունը։ Սա ի՞նչ կրկես է և ո՞ւմ է ձեռնտու քարկոծել Վստրեչի Ապերին․․․

Հիշեցնենք, որ հունիսի 4-ին, ոստիկանության կազմակերպված հանցավորության դեմ պայքարի գլխավոր վարչությունում Մամիկոն Բագրատունին հաղորդում էր տվել, որ 2017 թվականի հուլիսի 17-ին Նորագավիթ թաղամասում մի սուպերմարկետի մոտից «Վստրեչի ապեր» մականվամբ Արամ Վարդանյանը և մի խումբ անձինք, նախնական համաձայնությամբ, բռնություն գործադրելով առևանգել են իրեն, տեղափոխել Վարդանյանին պատկանող Արցախի փողոցի մի շինություն, տևական ժամանակ իր կամքին հակառակ պահել այնտեղ, ծեծի ենթարկել ու մարմնական վնասվածքներ պատճառել։