«Կոնվերս բանկ»-ի մասնաճյուղից ավազակությամբ առանձնապես խոշոր չափի գումարի հափշտակություն կատարելու գործը դատարանում է

ՀՀ քննչական կոմիտեի ԵՔՔՎ Կենտրոն և Նորք-Մարաշ վարչական շրջանների քննչական բաժնում «Կոնվերս բանկ» ՓԲ ընկերության «Սայաթ-Նովա» մասնաճյուղից ավազակությամբ առանձնապես խոշոր չափի գումարի հափշտակություն կատարելու դեպքի առթիվ հարուցված քրեական գործով, Պյոտր Ցիգանկովի մասով, հայտարարվել է նախաքննության ավարտի մասին։

Ավելի վաղ տեղեկացրել էինք, որ 2017թ. հոկտեմբերի 9-ին՝ ժամը 11:00-ի սահմաններում, «Կոնվերս բանկ» ՓԲ ընկերության «Սայաթ-Նովա» մասնաճյուղում վտանգավոր բռնություն գործադրելու, այն է՝ պայթյուն իրականացնելու վերաբերյալ գրավոր ներկայացրած սպառնալիքով, մասնաճյուղի կառավարչից Պ.Ցիգանկովը պահանջել և հափշտակել էր առանձնապես խոշոր չափերով գումար։ Դեպքի առթիվ հարուցվել էր քրեական գործ՝ ՀՀ քրեական օրենսգրքի 175-րդ հոդվածի 3-րդ մասի 1-ին կետով:

Ձեռնարկված միջոցառումների արդյունքում պարզվել են դեպքի մի շարք հանգամանքներ:

Մինչդատական վարույթում ձեռք բերված փաստական տվյալների համաձայն՝ ենթադրյալ հանցագործություն կատարած անձինք նախնական համաձայնություն են ձեռք բերել՝ «Կոնվերս բանկ» ՓԲ ընկերության «Սայաթ-Նովա» մասնաճյուղից ավազակությամբ առանձնապես խոշոր չափի գումարի հափշտակություն կատարելու շուրջ, կատարել դերաբաշխում:

Ըստ դերաբաշխման՝ խմբի անդամներից մեկը, օժանդակելով Պ.Ցիգանկովին, բանկի մասնաճյուղում գումարի առկայության վերաբերյալ տեղեկատվություն ստանալու նպատակով, 2017թ. հոկտեմբերի 5-ին գնացել է բանկի նշված մասնաճյուղ, հանդես եկել որպես «Կոնվերս բանկ» ՓԲ ընկերության գլխավոր տնօրենի կողմից ուղղորդված հաճախորդ, կառավարչին հայտնել 60.000 Եվրո գումարը ԱՄՆ դոլարով փոխանակելու մտադրության մասին և ձեռք բերել նախնական համաձայնություն։ Միաժամանակ մասնաճյուղ այցելած անձը կառավարչին հայտնել էր, որ վատառողջ լինելու պատճառով ինքն անձամբ չի կարող կատարել գործարքը և պայմանավորվածություն է ձեռք բերել, որ բանկ կայցելի եղբայրը:

2017թ. հոկտեմբերի 9-ին Պ.Ցիգանկովը մասնաճյուղի կառավարչի մոտ էր գնացել և հայտնել, որ հանդիսանում է 60 000 Եվրո գումարի փոխանակման հարցի շուրջ համաձայնություն ձեռք բերած անձի եղբայրը և առաջարկել գործարքը կատարել գանձապահի աշխատասենյակում՝ անվտանգության նկատառումներից ելնելով, ինչին կառավարիչը համաձայնել էր: Կառավարիչը, գործարքը կատարելու նպատակով, բացել էր չհրկիզվող պահարանը, որից հետո Ցիգանկովը գրավոր սպառնացել էր պայթեցնել՝ չհրկիզվող պահարանում առկա գումարն իրեն չտալու դեպքում։

Մասնաճյուղի կառավարիչը, սպառնալիքների ազդեցության ներքո, կատարել էր գրավոր ներկայացված պահանջը, և Պ.Ցիգանկովը, հափշտակելով չհրկիզվող պահարանում առկա առանձնապես խոշոր չափերի գումարը՝ 42.709.000 ՀՀ դրամ, 105.223 ԱՄՆ դոլար, 27.325 եվրո, 439.800 ՌԴ ռուբլի և 205 ֆունտ ստերլինգ, դիմել էր փախուստի՝ հափշտակելով «Կոնվերս բանկ» ՓԲ ընկերության առանձնապես խոշոր չափերով ընդհանուր 112 215 171 ՀՀ դրամ գումարները։

Պ.Ցիգանկովի նկատմամբ հայտարարվել էր հետախուզում՝ ավազակային հարձակում կատարելու մեղադրանքով։ Վերջինս հայտնաբերվել էր Վրաստանի Հանրապետությունում և, օրենքով սահմանված կարգով, 2018 թվականի հուլիսին տեղափոխվել Հայաստան ու ներկայացվել վարույթն իրականացնող մարմնին։ Դատարանը վերահաստատել էր նրա նկատմամբ ընտրված խափանման միջոց կալանավորումը:

Ձեռք բերված բավարար ապացույցների հիման վրա՝ Պ.Ցիգանկովին մեղադրանք էր առաջադրվել՝ ՀՀ քրեական օրենսգրքի 175-րդ հոդվածի 3-րդ մասի 1-ին կետով: Նկատի ունենալով, որ կատարված նախաքննությամբ մեղադրյալ Պ.Ցիգանկովի վերաբերյալ ձեռք բերված ապացույցները բավարար են՝ քրեական գործը մեղադրական եզրակացությամբ դատարան ուղարկելու համար, նրա վերաբերյալ դրվագը քրեական գործից անջատվել է առանձին վարույթ և հայտարարվել նախաքննության ավարտի մասին։