Վարորդից տնօրեն՝ մեկ քայլ Արարատ Միրզոյանի հետ

Խնամի-ծանոթ-բարեկամ սկզբունքի դեմ կատաղի պայքար մղելու իմիտացիա ստեղծող, բայց իրականում դրա մեջ թաթախված մեր կառավարության կարկառուն ներկայացուցիչները շարունակում են կադրային վերելք ապահովել իրենց նախընտրելիների համար։

Եթե վարչապետի պաշտոնակատար Նիկոլ Փաշինյանը շատ հանգիստ, առանց խղճի խայթի պատգամավոր է կարգում քաղաքականությունից հազարավոր կիլոմետրեր հեռու դերասան աներձագին, ապա փոխվարչապետի պաշտոնակատար Արարատ Միրզոյանն էլ պետական ապարատը դարձրել է իր բոստանն ու որոշել Մարզահամերգային համալիրի տնօրենի պաշտոնում կարգել իր ծանոթին՝ Սամվել Մելիքսեթյանին, ով ՄՀՀ-ի ժամանակավոր պաշտոնակատարն է՝ առավել հայտնի որպես Արարատի քայլի ընկեր։

Մելիքսեթյանը, սակայն, միայն Միրզոյանի քայլի ընկերը չէ, նա համարվում է նաև հյուրանոցներից մեկի վաստակավոր վարորդը։

Մարզահամերգային համալիրի տնօրենի պաշտոնում ծանոթին նշանակելու քողի տակ սակայն Պետական գույքի կառավարման կոմիտեն հայտարարել է բաց մրցույթ։
Ինչպես բոլոր հարցերում, այս հարցում ևս՝ դրա ազնվությանը որևէ մեկը չի հավատում։

Թեև հայտարարել են, որ բաց մրցույթ են անցկացնելու, սակայն մինչ այժմ հայտնի չեն հանձնաժողովի անդամների անունները և թե ինչ չափորոշիչներով են այդ մարդիկ դառնում հանձնաժողովի անդամ։

Մասնագիտությամբ ովքեր են վարորդ, խոհարար, թե, ասենք, երաժիշտ կամ PR մենեջեր․ այս կարևոր կետերը հայտնի չեն, փոխարենը հրապարակել են ՄՀՀ-ի տնօրենի թեկնածուին ներկայացվող  պարտադիր պահանջները․
• բարձրագույն կրթություն,
• ձեռնարկատիրական կամ կառավարման ոլորտի առնվազն 3 տարվա կամ առնվազն 5 տարվա մաuնագիտական աշխատանքային uտաժ,
•իր պարտականությունների կատարման համար անհրաժեշտ իրավական ակտերի իմացություն (այդ թվում` ՀՀ Սահմանադրություն, ՀՀ քաղաքացիական, ՀՀ աշխատանքային օրենսգրքեր, «Բաժնետիրական ընկերությունների մասին», «Պետական ոչ առևտրային կազմակերպությնների մասին» ՀՀ օրենքներ, պետական գույքի կառավարման գործընթացները կանոնակարգող ՀՀ օրենսդրություն և այլ իրավական ակտեր),
• կազմակերպության զարգացման ծրագիր մշակելու և զարգացման հեռանկարի մասին առաջարկություն ներկայացնելու կարողություն, աշխատանքի կազմակերպման և ղեկավարման անհրաժեշտ հմտություն:

Այս պահանջները ամենը չեն, կան նաև լրացուցիչները, որոնց պետք է տիրապետի ՄՀՀ-ի տնօրենի թեկնածուն։

Իսկ արդյոք այդ պահանջներին կտիրապետի՞ վաստակավոր վարորդը, չէ՞ որ դրանց անգամ չի տիրապետում նրան առաջ բրդող Միրզոյանը։