«Դուք չեք տխրում, մենք ենք տխրում»․ Փաշինյանը՝ Միրզոյանին

ՀՀ փոխվարչապետի ժ/պ Արարատ Միրզոյանը, Մշակույթի արդեն նախկին նախարար Լիլիթ Մակունցն ու նաև Սփյուռքի նախկին նախարար Մխիթար Հայրապետյանն ԱԺ պատգամավորի մանդատ կստանան։ Այս մասին կառավարության այս տարվա անդրանիկ նիստի ժամանակ հայտարարեց վարչապետի ժ/պ Նիկոլ Փաշինյանը։

Նա շնորհակալություն հայտնեց վերջիններիս համատեղ աշխատանքի համար և հույս հայտնեց, որ ԱԺ-ում նույն հունով կշարունակեն իրենց աշխատանքը։

Նրա այս հայտարարությունն անմիջապես արձագանք չգտավ կառավարություն մյուս անդամների կողմից, այնպես որ՝ Փաշինյանն ինքը հորդորեց ներկաներին ծափահարել իրենց արդեն նախկին գործընկերներին։

Արարատ Միրզոյանը շնորհակալություն հայտնեց իր և գործընկերների անունից, իր իսկ խոսքով, հրաշալի համագործակցության համար։

«Ուզում եմ ասել, որ մեր բոլորի համար սա հսկայական փորձառություն էր ու շատ պատասխանատու աշխատանք։ Անշուշտ, հաշվետու լինելու համար դեռ շատ առիթներ կլինեն, բայց համարձակ թեզ առաջ քաշեմ, հույս ունեմ, որ պատվով կատարել ենք մեր առջև դրված բոլոր խնդիրները: Տխրելու առիթ չկա, քանի որ անցնում ենք շատ պատվաբեր աշխատանքի՝ ԱԺ պատգամավորի և շարունակելու ենք ծառայել Հայաստանի Հանրապետությանը», - ասաց Արարատ Միրզոյանը։

«Դուք չեք տխրում, մենք ենք տխրում», - արձագանքեց Փաշինյանը։