Այո, детка, սա «նոր Հայաստանն» է․ փաստաբանն ուզում է Նաիրի Հունանյանին տեսնել ազատության մեջ

NEWSPRESS.am-ն արդեն անդրադարձել է նոր իշխանության պատրաստակամությանը՝ մարդասպան Մհեր Ենոքյանին ազատ արձակելու հարցում։ Չնայած այսօր Մհեր Ենոքյանը պնդում է, թե 19-ամյա երիտասարդին դաժանաբար սպանողն ինքը չի եղել, սակայն մենք արդեն հրապարակել ենք կադրեր, որտեղ Մհեր Ենոքյանը հանգիստ խոստովանում է, թե «մարդ եմ սպանել․․․»։ Իհարկե, այդ տեսանյութերից երկուսը YouTube-ը հեռացրեց, որովհետև պարունակում էին անմարդկային դաժանության կադրեր, սակայն Ենոքյանի խոստովանության կադրերը պահպանվում են։

Ինչևէ, պարզվում է, որ Մհեր Ենոքյանին ազատ արձակելու հարցում շահագրգռված անձինք կան։ Մասնավորապես՝ խոսքը Ենոքյանի կնոջ՝ Զարուհի Մեժլումյանի մասին է, ով ըստ տեղեկությունների՝ 2013 թվականին է ամուսնացել Ենոքյանի հետ։ Նա ՀՀ պետական վերահսկողության ծառայության ղեկավար Դավիթ Սանասարյանի լրատվական ծառայության ղեկավարն է։ Սպանված Աղաջանովի ընտանիքը՝  ծնողներ՝ Միխայիլ Աղաջանովը, Նելլի Ահարոնովան և քույրը՝ Ելենա Աղաջանովան, բաց նամակով դիմել են ՀՀ նախագահին, վարչապետի պաշտոնակատարին՝ ներման որոշումը կրկին անգամ վերանայելու համար: Նամակում նշված է, որ Զարուհի Մեժլումյանը, չարաշահում է իր պաշտոնական դիրքն ու փորձում միջամտել ամուսնու ազատ արձակման գործընթացին։

Թե որքանով են ճշգրիտ այդ տեղեկությունները, դեռ կպարզվի, ակնհայտ է, որ այսօր Ենոքյանի օգտին են խոսում ո՛չ միայն նրա հարազատները, այլև փաստաբաններ։ Ավելին՝ փաստաբան Արա Ղարագյոզյանը պահանջում է Ենոքյանին ազատ արձակել։ 

Հասկանալու համար այս փաստաբանի դիրքորոշումը, նկատենք՝ նրա հիշյալ գրառման ներքո լրագրող Ամալյա Առաքելյանը հավանաբար հեգնանքով մեկնաբանություն է թողել, թե այդ տրամաբանության մեջ պետք է ուրեմն ազատ արձակել նաև Հոկտեմբերի 27-ի՝ ԱԺ մի շարք պատգամավորների սպանությունների գործի մեջ մեղադրվող Նաիրի Հունանյանին, ինչին փաստաբանը լրջորեն արձագանքել է՝ «ՄԻԱՆՇԱՆԱԿ»․․․

Տեղի ունեցածին անդրադարձել է «ՔԳ» ՀԿ հիմնադիր անդամ Նարեկ Սամսոնյանը։

«Վերջին շրջանում անընդհատ մտքումս էն էր, թե երբ ա գալու էս օրը: Վստահ էի, որ շատ շուտով նաև Նաիրիի ազատ արձակման պահանջին ենք ականատես լինելու, բայց էլի էսքան շուտ չէի սպասում: Դեպքերը զարգանում են ավելի արագ, քան մենք պատկերացնում ենք, և, այո, детка, սա «նոր Հայաստանն» է, իսկ, եթե ինչ-որ բանի հետ համաձայն չեք, ուրեմն հանգիստ նստեք տեղներդ»,- գրել է նա ֆեյսբուքյան իր էջում:

Իրավիճակին տալով իր գնահատականը՝ Նարեկ Սամսոնյանը նաև հավելել է․

«Հ.Գ. Էս ա մեր 20 տարվա հանրային դիսկուրսի ծնունդը. ահաբեկիչներին հանրայնորեն արդարացնող իրավաբաններ (չասեք՝ փաստաբանի պարտականություններ տռա-լյա-լյա, էս չոլկով ջահելը Նաիրիի փաստաբանը չի), քաղաքական նախընտրությամբ առաջնորդվող «իրավապաշտպաններ», կեղծ քաղհասարակություն, մարդասպաններին ու ստահակներին արդարացնող կիսաշիզոֆրենիկ հանրային դեմքեր»,-գրել է Սամսոնյանը։