«Սիմոնյանի հետ որևէ այլ խնդիր չունեմ»․ Սանասարյանը հորդորում է քաղաքական որակումներ չտալ

«Այս ճչացող, իրականությունից կտրված մանիպուլացնող երևույթը որևէ ձևով չի կարող իրավիճակ փոխել»։

Լրագրողների հետ հանդիպման ժամանակ այդ մասին ասաց ՀՀ պետական վերահսկողական ծառայության պետ Դավիթ Սանասարյանը՝ անդրադառնալով Երևանի պետական համալսարանի ռեկտոր Արամ Սիմոնյանի հայտարարություններին, ըստ որոնց՝ նրա նկատմամբ «հետապնդումները» կուսակցական պատկանելության պատճառով են։ 

«Արամ Սիմոնյանը ներկայացնում է, որ ինքը Հանրապետական կուսակցությունից է, դրա համար է այս ամենը: Կլինեն ՀՀԿ-ից, թե «Քաղաքացիական պայմանագրից», թե այլ կուսակցությունից, բոլոր պաշտոնյաները չպետք է փորձեն որևէ ճչոցով մոլորեցնել մարդկանց»,- ասաց Սանասարյանը՝ հորդորելով քաղաքական որակումներ չտալ։

Ըստ նրա՝ ամենամեծ մանիպուլյացիաներից մեկն այն է, թե ինը միլիարդի գնումներ են ուսումնասիրվել: Դավիթ Սանասարյանի որակմամբ՝ դա սուտ է։

«Ուսումնասիրել ենք ո՛չ թե 9, այլ 2,5 միլիարդի գնումներ»,-ասաց նա:

Սանասարյանը վստահեցրեց նաև, որ եթե ուսումնասիրությունները լինեն երկարատև, այդ թվերը կկրկնապատկվեն, բայց չեն կարող, քանի որ ժամանակ չունեն:

«Մեր ուսումնասիրության համար ստեղծած տեղեկանքի համար պատասխանատու ենք։ Խայտառակ փաստեր կան, և իրավապահ մարմինները կներկայացնեն։ Այս գործը դատարան է գնալու, վստահեցնում եմ ձեզ, իսկ պարոն Սիմոնյանի հետ որևէ այլ խնդիր չունեմ»,- ասաց Սանասարյանը։

Հիշեցնենք, որ մինչ այդ Արամ Սիմոնյանը հրավիրել էր մամուլի ասուլիս, որտեղ հայտարարել էր, թե վերահսկողության պալատի գործողությունները հարվածում են համալսարանի և իր բարի համբավին։ Նա նշել էր նաև, որ ինքը երկար ժամանակ ՀՀԿ անդամ է, և չի բացառվում, որ իր նկատմամբ քաղաքական հետապնդում է իրականացվում։