Դատախազության բողոքի քննությունը հետաձգվել է զուտ տեխնիկական պատճառներով. Մանվել Գրիգորյանի պաշտպան

Մանվել Գրիգորյանին կալանքից ազատելու դեմ դատախազության բողոքի քննությունը հետաձգվել է զուտ տեխնիկական պատճառներով, որոշակի փաստաթղթերի տրամադրման անհրաժեշտություն կա: Այդ մասին այսօր լրագրողների հետ զրույցում ասաց Մանվել Գրիգորյանի պաշտպան Արսեն Մկրտչյանը: 

«Միջնորդություններ ներկայացնելու, պատրաստելու համար տրամադրվել է ողջամիտ ժամանակ և նիստը կկայանա մեկ այլ օր»,- նշեց Մկրտչյանը: 

Հարցին, թե ինչու Մանվել Գրիգորյանը չի մասնակցել դատական նիստին, Մկրտչյանն ասաց, որ նրա առողջական վիճակը լավ չի եղել, սակայն նա ցանկություն ունեցել է մասնակցել նիստին: 

Պաշտպանը նշեց նաև, որ Մանվել Գրիգորյանը կալանքից ազատվել է այն հիմքով, որ վերացել է կալանքի տակ մնալու անհրաժեշտությունը. «Դատարանը հնարավոր է գտել, որ կալանքը փոխարինվի գրավով: Հաշվի է առնվել նաև նրա հիվանդությունների բացասական դինամիկան: Այն հիմնավորումները, որոնք վարույթն իրականացնող մարմինը ներկայացրել էր նախաքննության ընթացքում կալանքի վերցնելուց, դրանք անընդհատ տեխնիկական կրկնության միջոցով չեն կարող հիմք հանդիսանալ հետագա կալանքները  երկարաձգելու համար»,- ընդգծեց Գրիգորյանի պաշտպանը: