Փողոցից եկել, դատարանով է սպառնում

Պետական վերահսկողության ծառայության պետ Դավիթ Սանասարյանն այսօր ասուլիս էր հրավիրել ԵՊՀ-ում իր ծառայության կատարած ուսումնասիրությունների արդյունքները հրապարակելու և ԵՊՀ ռեկտոր Արամ Սիմոնյանին հակադարձելու համար։

Սանասարյանը գերադասեց թվերից չխոսել՝ հաշվի առնելով նախորդ ասուլիսի ժամանակ թվերը կարդալ չկարողանալու իր դառը փորձառությունը և նախընտրեց մի քանի ակնահաճո և հանրահավաքային հայտարարություն անել և, իհարկե, մատ թափ տալ։

Նախ Սանասարյանը մատ թափ տվեց Արամ Սիմոնյանի վրա՝ վստահեցնելով, որ ԵՊՀ-ի գործը հասցնելու է դատարան, իսկ Սիմոնյանն էլ իրենց ծառայության հայտնաբերած չարաշահումներն անիմաստ է մանիպուլացիա անվանում։

Ի դեպ՝ այս բառը՝ մանիպուլացիա, Սանասարյան Դավիթն ասուլիսի ողջ ընթացքում արտաբերեց մի քանի անգամ՝ նոր սովորած աշակերտի պես տուրք տալով նորաձև բառեր օգտագործելու իր թիմակիցների գործելաոճին։

Թեև Դավիթ Սանասարյանն ասուլիսի ընթացքում մեկ-երկու անգամ կրկնեց, որ բացի ԵՊՀ-ի թեմայից, այլ հարցերի չի պատրաստվում պատասխանել, դե այլ հարցերի հանպատրաստից պատասխանալելու համար կարողություններ և գիտելիք է պետք, ինչից, թերևս, այս տղան զուրկ է, սակայն լրագրողներին,այնուամենայնիվ, հաջողվեց հնչեցնել վերջին շաբաթվա ընթացքում մամուլի ամենաքննարկվող հարցերից մեկը՝ իր ծառայության լրատվականի պետ Զարուհի Մեջլումյանի և իր ներմանը սպասող մարդասպան Ենոքյանի մասին։

Սանասարյանը նախ հերքեց, որ ինքը որևէ կերպ ազդել է Արդարադատության նախարարության և ներման հանձնաժողովի վրա, ապա հերոսացավ, թե երբ Զարուհի Մեջլումյանին հրավիրել է, որ գա և աշխատի որպես իր ղեկավարած գերատեսչության լրատվականի պետ, Զարուհին իրեն զգուշացրել է, որ գուցե քարկոծվեն։

«Ես ասել եմ, որ կապ չունի, մենք պրոֆեսիոնալ գործի մեջ ենք: Մեժլումյանն աշխատանքի շրջանակներում որևիցե այլ հարցով չի զբաղվել: Եթե մի ապացույց լինի, որ ես կամ ՊՎԾ որևէ պաշտոնյա ասել է, որ որևէ հարցում այս կամ այն որոշումը պետք է լինի, ես խոստանում եմ, որ հրաժարական կտամ ու այլևս քաղաքականությամբ չեմ զբաղվի»,-ասել է Սանասարյանն ու հավելել, որ եթե որևիցե մեկը պաշտոնապես նման բան հայտարարի, դատարանում կհայտնվի։

Փաստորեն, շարքային ակտիվիստ, մի քանի կուսակցությունում հանգրվանած և պաշտոնատենչությունից դրդված ճիշտ ժամանակին ճիշտ կուսակցություն մտած Դավիթ Սանասարյանը սկսել է սպառնալ դատարանով։

Ասում է՝ դատարանում կհայտնվեն, եթե ասեն, որ Զարուհի Մեջլումյանն է ապահովել մեդիայում դրական իմիջ մարդասպանի համար։

Ասում է՝ դատի կտամ, եթե հանգդնեն ասել, որ եթե չլիներ սիրահարված լրագրողուհին, Մհեր Ենոքյանի մասին որևէ մեկը չէր հիշի այնպես, ինչպես չեն հիշում այլ մարդասպանների ու ցմահ դատապարտյալների։

Ասում է՝ դատի կտա, եթե բարձրաձայնեն, որ մարդասպանին ներում շնորհելու որևէ խնդրագիր դրական եզրակացություն չէր ստանա, եթե չլիներ պաշտոնն ու դրա տված լիազորությունները։

Էստեղ են ասել՝ բիրդան չզարգացա՞ր կամ ինչ շուտ մոռացար, թե ով ես դու և որտեղից ես գալիս․ ընդամենը՝ փողոցից։

NEWSPRESS.am