«Ծիծաղելի է, որ ոստիկանությունում նման հաղորդմանն ընթացք են տվել»․ Նարեկ Մալյանի դեմ արշավ է սկսվել

Դաժան մարդասպանության համար ցմահ դատապարտված Մհեր Ենոքյանին ներում շնորհելու դեմ բողոքի ակցիա կազմակերպած Նարեկ Մալյանին մեղադրում են 3 տարբեր հոդվածներով։ Այդ մասին գրող, հրապարակախոս, ՀՀ նախկին ոստիկանապետի խորհրդական Մալյանն ասաց NEWSPRESS.am-ի հետ զրույցում։

Մհեր Ենոքյանի կինը՝ Զարուհի Մեջլումյանը, ով պետական ապարատում, իսկ ավելի կոնկրետ՝ ՀՀ Պետական վերահսկողական ծառայությունում զբաղեցնում է լրատվության ու հասարակության հետ կապերի բաժնի պետի պաշտոնը, հաղորդում է տվել ոստիկանությունում՝ 3 տարբեր հանցակազմով։ Զարուհի Մեջլումյանը Նարեկ Մալյանին մեղադրել է իրեն ինքնասպանության հակելու և հոգեկան ցավ պատճառելու մեջ։

«Շատ ծիծաղելի է, երբ ոստիկանությունը ընդունում է ինքնասպանության հակելու մասով հանցագործության հաղորդում և ընթացք է տալիս դրան, երբ ո՛չ ինքնասպանության փորձ կա, ո՛չ ինքնասպանություն։ Այսինքն, դեպք չկա, բայց այդ չեղած դեպքի մասով քրեական հետապնդում են իրականացնում»,-ասում է Նարեկ Մալյանն ու վստահեցնում, որ իրավական համակարգի վրա ակնհայտ ճնշում կա։ 

Ըստ նրա՝ կարող են հաղորդում տալ աշխարհի ամենաանհեթեթ մեղադրանքներով ու ոստիկանությունը ընդունի այդ հաղորդումը, բայց ընթացք տալ միայն նրանց, որոնք իսկապես հանցավոր տարր են պարունակում իրենց մեջ և չեն հակասում տրամաբանությանը։

«Այդպես կարող է մեկը գնալ ու ասել հարևանիս տատը նավսեց ու ես գնացի ինքնասպանության, բայց դա չի նշանակում, որ ոստիկանությունը պետք է հաղորդումն ընդունելուց հետո գործին ընթացք տա»,-նկատում է մեր զրուցակիցն ու հավելում, որ իրավական տեսանկյունից՝ այս ամենը ծիծաղելի է և կարելի է նույնիսկ անեկդոտի վերածել։

Նարեկ Մալյանի համոզմամբ, Մհեր Ենոքյանի կինը չարաշահում է իր պաշտոնեական դիրքը. աշխատելով Պետական վերահսկողական ծառայությունում, նա լուրջ լծակներ ունի բոլոր պետական ինստիտուտների նկատմամբ։

«Հաշվի առնելով այն, որ մարդասպանի տիկինը լիակատար կերպով գտնվում է մարդասպանի տրամադրության տակ և նրա ազդեցության անմիջական կրողն է՝ ինչպես նաև դա երևաց առաջին հեռուստաալիքով արված նրա հայտարարություններից, այդ ամենը ինձ առիթ է տալիս ենթադրելու, որ այս պաշտոնում Մեջլումյանին նշանակելու շարժառիթը Ենոքյանին բանտից ազատելու պրոցես սկսելն է։ Հակառակ դեպքում, նա պետք է արդեն հրաժարական տար իր պաշտոնին, քանի որ բոլոր նորմալ երկրներում, որտեղ պաշտոնյան, այն էլ եթերով ու ասուլիսների ժամանակ, հայտարարում է, որ ամեն ինչ անելու է և ամեն գնով ազատելու է իր սիրելի մարդասպան ամուսնուն բանտից, ապա այդ դեպքում առնվազն կոռեկտ չի, երբ որ ինքը շարունակում է պաշտոնավարել»,-պարզաբանում է Մալյանը և հավելում, որ այս ամենը հիմք է հանդիսանում իր համար ենթադրելու, որ ոստիկանությունը նման անտրամաբանական հաղորդմանը ընթացք է տվել զուտ ճնշման ազդեցության տակ։

Ի դեպ, Մալյանը նկատում է, որ իր նկատմամբ ճնշումները միայն իրավական մասով չեն սահմանափակվում, այլև առկա են ֆեյսբուքյան հարձակումներ։

«Հետաքրքիր զուգադիպությամբ, ֆեյսբուքյան բոլոր հարձակվողներն անպայման Սորոսից հինգանիշ թվով գրանտ ստացածներ են։ Սա ճնշման մյուս կողմն ա։ Մեծ հաշվով՝ այս ամբողջ պայքարի նպատակներից մեկն է՝ բացահայտել այն խմբին, ով մեր պետության ներսում զբաղված է եղել հակամարդկային արժեքների քարոզով։ Այսիքն, ոչ միայն մարդասպանին հանել բանտից, այլև մարդասպանի նկատմամաբ մարդասիրական քարոզ իրականացնել, իսկ սա ավելի վատ է»,-նկատում է Մալյանը։

Նա նաև մատնանշում է ֆեյք օգտատերերի սպառնալիքներն իր նկատմամբ, որոնք սկսվեցին այն բանից հետո, երբ ինքը փաստեր ներկայացրեց Մհեր Ենոքյանի կատարած սպանության մասին։ Նարեկ Մալյանը նկատում է, որ իր բերած փաստերը չեն քննարկվում, քանի որ դրանք հստակ են և ճշգրիտ։ Իսկ դրանից բացի՝ այն, ինչ ներկայացվում է սպանության մասին՝ իրեն չի էլ հետաքրքում, քանի որ հորինված է և շարադրված ցինիկ դատողությամբ։