Ծառայողական մեքենա ու շատ աշխատավարձ՝ ՕԳԳ չունեցող պատգամավորիկներին

Ազգային ժողովի «Իմ քայլը» խմբակցությունը խորհրդարանում կունենա 8 հանձնաժողովի նախագահ:

ԱԺ 11 հանձնաժողովներից 8-ը բաժին կհասնի իշխող մեծամասնությանը, 2-ը՝ ԲՀԿ-ին, 1-ը՝ ԼՀԿ-ին։

Հաշվի առնելով Ազգային ժողովի մշտական հանձնաժողովների կարևորությունն ու այդ հանձնաժողովների նախագահների առաջ ծառացած մեծ պատասխանատվությունը, սպասելի էր, որ այդ հանձնաժողովների նախագահների պաշտոնում իշխող մեծամասնությունը կառաջադրի մասնագետներին, սակայն սպասելիքները, բացառությամբ մեկ-երկուսի՝ չարդարացան։ Հանուն արդարության նշենք, որ ԱԺ մյուս երկու խմբակցությունների առաջադրած թեկնածուների մասին խոսելն ավելորդ է, քանի որ և՛ ԱԺ Տարածաշրջանային և եվրասիական ինտեգրման հարցերի մշտական հանձնաժողովի նախագահի թեկնածուի համար առաջադրված Միքայել Մելքումյանը, և՛ Մարդու իրավունքների և հանրային հարցերի մշտական հանձնաժողովի նախագահի թեկնածուի համար առաջադրված Նաիրա Զոհրաբյանը, և՛ Ֆինանսավարկային և բյուջետային հարցերի մշտական հանձնաժողովի նախագահի պաշտոնում առաջադրված Մանե Թանդիլյանի թեկնածությունները հասարակության ադեկվատ հատվածի կողմից ընդունելի են՝ հաշվի առնելով այս թեկնածուների պրոֆեսիոնալիզմն ու աշխատանքային փորձը։

Շատ լուրջ մտահոգությունների տեղիք է տալիս իշխող մեծամասնության առաջադրած որոշ պատգամավորների թեկնածությունները։

Օրինակ՝ «Իմ քայլը» խմբակցությունը ԱԺ Եվրոպական ինտեգրման հարցերի մշտական հանձնաժողովի նախագահի պաշտոնի համար առաջադրեց վարչապետի նախկին խոսնակ Արման Եղոյանի թեկնածությունը։ 

Եղոյանի պրոֆեսիոնալիզմի մասին խոսել, թերևս, չենք կարող․ խոսելու բան էլ չկա, չէ՞ որ նա վարչապետի խոսնակ եղած ժամանակ ապացուցել է, որ իր տեղում չէ․ բոլորս ենք հասցրել առնչվել նրա կցկտուր և ոչ կապակցված խոսքին, հարցերից անտեղյակ՝ դրանց պատասխաններ տալու՝ նրա անհաջող փորձերին։

Արման Եղոյանն իր գրագիտությամբ այսօր փայլեց նաև խորհրդարանում: Օրինակ՝ փոխանակ բացեր և կարդար ԱԺ կանոնակարգ օրենքի 15-րդ հոդվածի 7-րդ մասը, որտեղ գրված է, որ ԱԺ հանձնաժողովի որոշումներն ընդունվում են քվեարկությանը մասնակցած հանձնաժողովի անդամների ձայների մեծամասնությամբ, եթե որոշմանը կողմ է քվեարկել հանձնաժողովի անդամների ընդհանուր թվի առնվազն մեկ քառորդը, դասը չսովորած աշակերտի նման ձայն խնդրեց և իր կուսակից պատգամավոր Հայկ Վարդանյանից հետաքրքրվեց, թե հանձնաժողովների մեծ մասը, եթե ունի զույգ անդամ, քվեարկությունների ժամանակ ձայները կիսվելու դեպքում ինչպե՞ս է որոշում կայացնելու։
Այս պարզունակ հարցին ի պատասխան Արման Եղոյանի կուսակից պատգամավորն ասաց, որ որոշում կայացնելու համար անհրաժեշտ է ձայների 25 տոկոսի կամ ¼-ի առկայությունը։

Արման Եղոյանը նման ծիծաղելի իրավիճակում չէր հայտնվի, եթե փորձեր երկրի կարևորագույն օրենսդիր մարմին մուտք գործելուց առաջ կարդալ այդ մարմնի աշխատանքը կանոնակարգող օրենքը։

Քաղաքական մեծամասնության հաջորդ նոնսենս որոշումը կապված է նախարարի պաշտոնում խայտառակ արդյունքներ ապահոված Մխիթար Հայրապետյանի հետ։
Պարզվում է՝ նրան էլ որոշել են կարգել ԱԺ Գիտության, կրթության, մշակույթի, երիտասարդության և սպորտի հարցերի մշտական հանձնաժողովի նախագահ։

Սույն երիտասարդին մամուլն այնքան է քննադատել, որ նրա մասնագիտական որակների մասին նախընտրում ենք լռել՝ հիշեցնելով մի խոսուն փաստ․ Մխիթար Հայրապետյանը սփյուռքի նախարար աշխատած ողջ ժամանակահատվածում բացի իր նախորդի նախագծերը ռեբրենդինգի ենթարկելուց՝ որևէ էական գործ այդպես էլ չկարողացավ անել՝ հասնելով նախարարության փլուզմանը:

Հաջորդ կարևոր՝ Արտաքին հարաբերությունների մշտական հանձնաժողովի նախագահի պաշտոնում «Իմ քայլը» առաջադրել է Արտաքին գործերի նախկին փոխնախարար Ռուբեն Ռուբինյանի թեկնածությունը։ 

Դե, Ռուբեն Ռուբինյանն էլ իր կարողությունների մասին ցույց տվեց Արմեն Աշոտյանի հետ «մենամարտում»՝ կրելով ամոթալի պարտություն: Հետաքրքրական է՝ նման քանի՞ պարտություն է կրելու հակառակորդ պետությունների պաշտոնյաների հետ մենամարտերում։ 

Բնականաբար, որևէ մեկս կասկած չունենք, որ «Իմ քայլը» դաշինքի առաջադրած այս հանձնաժողովների նախագահների թեկնածուները վաղը կդառնան հանձնաժողովի նախագահներ և մեր՝ հարկատուներիս հաշվին կունենան ծառայողական մեքենաներ, լավ աշխատավարձ այն պարագայում, որ մինչ այս նրանց արձանագրած ցուցանիշը փաստել է, որ նրանք կարող են աշխատավարձի փոխարեն հարկատուներին վերադարձնել միայն խայտառակ օգտակար գործողության գործակից։

NEWSPRESS.am