«Եթե հաշիվներ պարզելու կարիք կա, պարզեք դահլիճից դուրս»․ թեժ բանավեճ՝ ԲՀԿ-ական և ԼՀԿ-ական պատգամավորների միջև

Այսօր՝ հունվարի 16-ի ԱԺ նիստի ժամանակ, «Լուսավոր Հայաստան» խմբակցության պատգամավոր Արման Բաբաջանյանն ԱԺ ամբիոնից քննադատեց Հայաստանի արտաքին քաղաքականությունը։ Մասնավորապես, անդրադառնալով Ուկրաինայում Հայաստանի նախկին դեսպան Անդրանիկ Մանուկյանի վարած քաղաքականությանը, նա նկատեց, որ նրա  օրոք վատացել են հայ-ուկրաինական հարաբերությունները:

«Մանուկյանը սպասարկել է ռուսական շահերը, համագործակցել քրեական տարրերի հետ»,-հայտարարեց Բաբաջանյանը։

Արձագանքելով նրա հայտարարությանը՝ «Բարգավաճ Հայաստան» խմբակցության պատգամավոր Արման Աբովյանը պնդեց, որ Բաբաջանյանի մեղադրանքներն ադրբեջանական քարոզչության թեզերն են: Արման Աբովյանը, 3 տարի լինելով Անդրանիկ Մանուկյանի խորհրդականը, ամբիոնից պաշտոնապես հայտարարեց, որ Բաբաջանյանի առաջ քաշված թեզերն իրականության հետ աղերս չունեն։

«Պարո՛ն Բաբաջանյան, ի՞նչն է Ձեզ ստիպում, որ ասում եք՝ վատացել էին հարաբերությունները։ Ի՞նչն է Ձեզ ստիպում զրպարտել, ու զբացվել շարունակական զրպարտությամբ, այ էդ հարցը պետք է մի հատ հասկանանք»,-ասաց Աբովյանը։

Աբովյանի այս հարցը վրդովեցրեց ԼՀ խմբակցության ղեկավար Էդմոն Մարուքյանին։ Նա սկսեց տեղից աղմկել ու «հին» ու «նոր» Հայաստան տարանջատել։

«Ի՞նչ հին Հայաստան, ես չեմ հասկանում»,-ամբիոնից ասաց Աբովյանը։

Այդ ժամանակ բանավեճին միացավ նաև  ԲՀԿ-ական պատգամավոր Հրանտ Մադաթյանը։ Քանի որ դահլիճում միացված բարձրախոսներ չկային, ուստի դժվար էր որսալ, թե կոնկրետ ինչ են խոսում պատգամավորները, բայց Մարուքյանը բորբոքվեց այն աստիճան, որ տեղից վեր կացավ ու մոտեցավ Մադաթյանին։ Ամբիոնի մոտից նրանց մոտեցավ նաև Աբովյանը և ԲՀԿ-ական Նաիրա Զոհրաբյանը, ովքեր փորձում էին հեռացնել Մարուքյանին։

Ի վերջո ԱԺ նախագահ Արարատ Միրզոյանը կոչ արեց դադարեցնել վիճաբանությունը։

«Խնդրում եմ դահլիճում պահպանել լռություն: Հերթագրվեք և ամբիոնից խոսեք։ Խնդրում եմ պահպանեք հարգանք ԱԺ պատգամավորի կարևոր ինստիտուտի նկատմամբ, միմյանց նկատմամբ և ԱԺ նախագահության նկատմամբ: Հետայսու, եթե հաշիվներ պարզելու կարիք կա, պարզեք դահլիճից դուրս»,-ասաց Միրզոյանը:

Երբ կրքերը փոքր-ինչ հանդարտվեցին, Արման Աբովյանը նկատեց, որ Արման Բաբաջանյանի կողմից առաջ քաշվեցին ադրբեջանական թեզեր։

«Այստեղ բոլոր արտահայտությունները, որ եղան, Ուկրաինայում ՀՀ նախկին դեսպան Անդրանիկ Մանուկյանի հասցեին, բացառապես սուտ էին: Հիմնականում արտացոլում էին ադրբեջանական տեսակետը: Ես չգիտեմ՝ դուք ում ջրաղացին եք ջուր լցնում»,-վրդովված ասաց Աբովյանը՝ հավելելով, որ թույլ չի տա, որ այս ամբիոնից ապատեղեկատվություն հնչի։