Հերթագրվեմ, հարցից թռնեմ

Հունվարի 14-ից 7-րդ գումարման Ազգային ժողովի նիստերին հետևող լրագրողներս կանգնել ենք մի անհասկանալի հանելուկի առաջ։

Արդեն երեք օր է՝ նորեկ պատգամավորները, երբ ԱԺ նախագահը հայտարարում է հերթագրում, տարբեր հարցերի վերաբերյալ հերթագրվում են։

ԱԺ նիստերի դահլիճի գլխավոր էկրանին հայտնվում են պատգամավորների անունները, նիստին հետևող լրագրողներս սրտատրոփ սպասում ենք, թե ինչ հարցադրումներ են առաջադրելու նրանք, սակայն պարզվում է՝ երբ գալիս է հարց տալու իրենց հերթը, նրանք հայտարարում են, որ իրենց հարցը հանված է։

Նորելուկները, որոնցից մեկն էլ այսօր վարչապետի եղբոր որդին՝ Սիփան Փաշինյանն էր, հայտարարում են, թե իրենց հարցը հանում են, քանի որ արդեն պատասխանը ստացել են։ Վստահաբար, նրանք ոչ թե ստացել են իրենց հարցերի պատասխանները, այլ, պարզապես, իրենք իրենցից են ամաչում, ամաչում եմ կցկտուր երկու տող կարդալ․ իսկ եթե հարցադրման մեջ մի այնպիսի վրիպակ թույլ տան, որ պարզի՞ իրենց իրական բովանդակությունը։

Բնականաբար, այս մտահոգությունների ֆոնին ավելի լավ է լինել հերթագրվող, բայց հարցից թռնող պատգամավոր։

Ազգային ժողովի նորեկները նաև խնդիրներ են ստեղծել քարտուղարության համար։
Արդեն երեք օր է՝ նրանք չեն կարողանում սովորել գրանցվելու կարգն ու կանոնը։ Կա՛մ գրանցվում են՝ ձեռքները վեր բարձրացրած, կա՛մ գրանցման գործընթացը կրկնում են մի քանի անգամ․ օրինակ երեկ՝ երեք անգամ ու այս ամեն ինչից մանկապարտեզի հոտ է գալիս․․․

NEWSPRESS.am