Նիկոլ Փաշինյանն ու Դավիթ Սանասարյանն ուզում են մոպեդով գնալ գործի․ դեմ է միայն Ատոմ Ջանջուղազյանը

Այսօր Կառավարության հերթական նիստն էր, որտեղ քննարկվում էր օդի աղտոտվածության նվազեցմանն ուղղված՝ էլեկտրական շարժիչով տրանսպորտային միջոցների կիրառումը խթանելու հարցը։ Օրինագծով առաջարկվում էր ՀՀ հարկային օրենսգրքի 64-րդ հոդվածով սահմանված ավելացված արժեքի հարկից ազատված գործարքների ու գործառնությունների ցանկում ընդգրկել նաև էլեկտրական շարժիչով տրանսպորտային միջոցների ներմուծումը։ Ի դեպ, օրինագիծն արժանացավ կառավարության հավանությանը և մինչև 2022թ.-ը արտոնություն տրվեց:

Օրենքի նախագծով նախատեսվում է նպաստավոր պայմաններ ստեղծել երկրում էլեկտրական շարժիչով տրանսպորտային միջոցների ձեռքբերումն ու կիրառումը խթանելու, մթնոլորտային օդի աղտոտվածության նվազեցման, ինչպես նաև ՀՀ էներգետիկ կախվածության նվազեցման համար։

Էլեկտրական շարժիչով մոտոցիկլների (ներառյալ մոպեդները) կիրառման ավելացումը կնպաստի նաև խցանումների նվազմանն ու երթևեկության անվտանգության մեծացմանը։

Քննարկումը կառավարության նիստում տևեց շուրջ 45 րոպե, և սա այն երկրում, որը ՀԱՊԿ-ում դիրքերի թուլացում է արձանագրել, ԵՄ հետ հարաբերություններում առաջ քայլ չի արել, լրջագույն խնդիրներ կան Արցախի հարցով բանակցություններում և շուկայում թանկացումներն օր օրի ավելանում են։ Նման խնդիրներ ունեցող պետության գործադիր մարմինը պարզապես բարոյական իրավունք չունի նիստում «թիթեռ նկարել» և ժողովրդի «ականջներից լապշա կախել»։

Հետաքրքիր է, որ հարցին միակ դեմը Ատոմ Ջանջուղազյանն էր, ով հանգամանալից բացատրում էր, որ՝ տղե՛րք ջան, «ոտքներդ վերմակներիդ չափով մեկնեք», բայց Ատոմ Ջանջուղազյանն այդպես էլ մնաց փոքրամասնություն: Եւ իր ո՞ր մեղքի համար էր Ջանջուղազյանն ընկել այս միջավայր...

Քննարկման ընթացքում Նիկոլ Փաշինյանն ասաց՝ «Աշխարհը գնում է այդ ճանապարհով և ակնհայտ է, որ 20-30 տարի հետո տրանսպորտային միջոցների կեսից ավելին լինելու են էլեկտրամոբիլները: Մենք ուզում ենք այդ տեխնոլոգիայի ներկրումը խթանենք»:

Եթե մեր կառավարությունն իրոք մտածում է անցում կատարել էլեկտրամոբիլներին, պետք է նախ սկսեն իրենցից: Օրինակ՝ Նիկոլ Փաշինյանը, Տիգրան Ավինյանն ու Արարատ Միրզոյանը, կամ հե՛նց Դավիթ Սանասարյանն, ով նման առաաջարկով հանդես եկավ՝ մոպեդով գնան աշխատանքի կամ հանդիպումների, ինչո՞ւ ոչ։

Հարցին մոտենում են շահագրգիռ կերպով, սակայն օր օրի ավելացնում են իրենց երկաթյա նժույգները։ Հատկապես Դավիթ Սանասարյանի՝ բենզինով աշխատող ծառայողական մեքենայի գնի մասին արդեն լեգենդներ են հյուսվել։

NEWSPRESS.am