«1000-ից ավելի մարդ կդառնա գործազուրկ»․ նարգիլեի բիզնեսով զբաղվողները պահանջում են հետ կանչել օրինագիծը

Հայաստանում նարգիլեի բիզնեսով զբաղվողները վստահեցնում են՝ օրենքի նախագիծն ունի բավականին բացթողումներ և պետք է լուրջ քննարկման ենթարկվի։

Այդ մասին նրանք հայտարարեցին լրագրողների հետ հանդիպման ժամանակ՝ անդրադառնալով «Ծխախոտային արտադրատեսակների օգտագործման բացասական ազդեցության նվազեցման և կանխարգելման մասին» օրինագծին։

Տիգրան Ասրյանը, Ժորա Փանոսյանն ու Գոռ Գասպարյանը պատմեցին, որ իրենք արդեն եղել են առողջապահության նախարարությունում, սակայն, իրենց խոսքով, այնտեղ փափուկ բարձ են դրել իրենց գլխի տակ, թե օրենքը դեռ ուժի մեջ չէ և պետք է քննարկվի։ Ավելի ուշ պարզվել է, որ այլևս արգելվելու է նարգիլեն։

«Մենք եղանք առողջապահության նախարարությունում և հարցրեցինք, թե ինչո՞ւ են առանց քննարկման ընդունել օրինագիծը, սակայն աշխատակիցներից մեկը մեզ ասաց, թե իբր հոկտեմբեր, նոյեմբեր ամիսներին անց են կացվել հանրային քննարկումներ, ներկա են գտնվել շահագրգիռ կողմերը և հաշվի են առնվել դրական ու բացասական կողմերը։ Մենք ասացինք, որ նարգիլեի գծով շահագրգիռ կողմ միայն մենք ենք հանդիսանում, իսկ մեզ հետ երբեք նման քննարկումներ չեն անցկացրել»,-իրավիճակը ներկայացրեց ասուլիսի մասնակիցներից Գոռ Գասպարյանը։

Այստեղ էլ հենց առողջապահության աշխատակիցները նրանց հանգստացրել և տուն են ուղարկել, թե կրկին հանրային քննարկումներ կլինեն և նրանց կհրավիրեն։

Վերջիններս, առողջապահության աշխատակցի հորդորով դիմում են գրել և հեռացել, իսկ դրանից 1-2 ժամ անց հեռուստատեսությամբ ելույթ է ունեցել փոխնախարարը՝ ասելով, որ հանրային քննարկումներ անց են կացվել, շահագրգիռ կողմը ներկա է եղել։

«Մենք հիմա ուզում ենք, որպեսզի քննարկումներ լինեն կառավարության ներկայացուցիչների մասնակցությամբ»,- ասաց Գոռ Գասպարյանը:

Ժորա Փանոսյանը նկատեց. «Օրենքի հաստատման դեպքում 1000-ից ավելի մարդ կդառնա գործազուրկ, պետբյուջե հարկեր չեն վճարի, վնաս կհասցնեն նաև տուրիզմին: Ես համակարգում եմ նարգիլե սիրողների միությունը, անդամներ կան, մոտ 17 տարի նման բիզնես են Հայաստանում ծավալում»: