Ակտիվիստի բացառիկ խոստովանությունը

Նախկին պատգամավոր, գեներալ Մանվել Գրիգորյանն այսօր կրկին կկալանավորվի։

Րոպեներ առաջ դատարանը դատավոր Արսեն Նիկողոսյանի գլխավորությամբ որոշում կայացրեց բավարարել ՀՀ գլխավոր դատախազության բողոքը և կրկին կալանավորել Մանվել Գրիգորյանին։

Այս քայլով իշխանությունները փակեցին Մանվել Գրիգորյանի կանալավորումը պահանջող ակտիվիստների բերանը, ազատեցին իրենց գլուխը ճանապարհները փակած ցուցարարներին ցրելու ծանր բեռից: Կարճ ասած՝ լռեցրին այն աղմուկը, որը խռովում էր իշխանությունների անդորրը։

Ցուցարարները դատարանի որոշումը համարեցին իրենց հաղթանակը և հենց դատարանի շենքի դիմաց շամպայն խմեցին, լրագրողներին էլ հրավիրեցին Էջմիածին՝ խորոված ուտելու։

Ցուցարարներից մեկն էլ` Հայկազ Մակարյանը, ուրախության պահերին լեզվից թռցրեց այն, ինչի մասին խոսում են բոլորը, գիտեն բոլորը, բացի իշխանավորներից։

«Սա հաղորդում է, մեսիջ է բոլոր այն մարդկանց․․․․ դա վերաբերում է և՛ Ռոբերտ Քոչարյանին, և՛ Խաչատուրովին և բոլոր այն մարդկանց, ովքեր պետք է կալանավորվեն։ Հաղթեց ժողովրդի իշխանությունը և ամենակարևորը՝ հաղթեց կառավարությունն իր ուղերձով, այդ թվում՝ Նիկոլ Փաշինյանը»,- լրագրողների հետ զրույցում իր հույզերը կիսեց ակտիվիստը։

Սա ուրախությունից գլուխը կորցրած ցուցարարի խոստովանությունն է, անկեղծ խոստովանությունը․ նա բարձրաձայն ասաց այն, ինչի մասին արդեն խոսում են իշխանության կուլիսներում։

Այո՛, հաղթեց կառավարությունն իր ուղերձով, հաղթեց Նիկոլ Փաշինյանը, ով նույն ցուցարարներին բացահայտ ասաց, որ իրավունք չունեն ճանապարհ փակելու, որովհետև դա իր մենաշնորհն է։

Հաղթեց այն իշխանությունը, որը շարունակում է երկրում իրականացնել կամընտրական արդարադատություն, օրինակ՝ բռնում է Մանվել Գրիգորյանին, Ռոբերտ Քոչարյանին, բայց ոչ, ասենք, Լևոն-Տեր Պետրոսյանին կամ Սերժ Սարգսյանին։ Նրանց չի բռնում․ նրանց հետ պայմանավորվում է։ Իվ իրապես ճիշտ է ակտիվիստ Մակարյանը․ այո′, հաղթեց կառավարության ուղերձը և Նիկոլ Փաշինյանը։

Հիշեցնենք, որ Մանվել Գրիգորյանը կալանավորվել էր հունիսի 19-ին` Երևանի ընդհանուր իրավասության դատարանի դատավոր Մարինե Մելքոնյանի որոշմամբ: Գրիգորյանին մեղադրանք է առաջադրվել ապօրինի կերպով ռազմամթերք ձեռք բերելու եւ նրա կնոջ` Նազիկ Ամիրյանի, դստեր` Այծեմնիկ Գրիգորյանի, Էջմիածին քաղաքի բնակիչներ Սեյրան Ազարյանի, Արմեն Հակոբյանի և այլ անձանց հետ նախնական համաձայնությամբ իրեն պատկանող առանձնատներում պահելու համար, ինչպես նաեւ՝ մի խումբ անձանց հետ նախնական համաձայնությամբ յուրացման եղանակով իր վստահությանը հանձնված առանձնապես խոշոր չափի ուրիշի գույք հափշտակելու համար:

NEWSPRESS.am