«Աննայի օգնականն ասում ա՝ գլխիդ կաթո՞ւմ ա՝ չէ՛, տուն ա՝ նստի էլի»․ միայնակ մայրն իր աղջկան բուժելու հույսով՝ Պուտինից ապաստան է խնդրում

Ծննդով վանաձորցի Անահիտ Ղազարյանն ապրում է Շահումյան գյուղի կիսաքանդ տներից մեկում՝ հիվանդ աղջկա հետ։

Տիկնոջ և նրա աղջկա` 29-ամյա Աննա Զալկինայի խնդրին NEWSPRESS.am-ն անդրադարձել է դեռ նախորդ տարվա հոկտեմբերին։ Աղջիկը 4 տարեկանում վնասվածք է ստացել ծոծրակի շրջանում, ինչի հետևանքով կորցրել է առողջությունը։

Կինը դիմել է Առողջապահության նախարարություն, վարչապետին ու նրա տիկնոջը՝ Աննա Հակոբյանին, սակայն այսօր նա դարձյալ իր խնդրի հետ է։

«Ես դիմում եմ վարչապետին, դիմում եմ Սոցապնախարարություն, դիմում եմ Աննա Հակոբյանին, նրանք էլ դիմումս ուղարկում են Առողջապահության նախարարություն ու ինձ ասում են, որ գումար չունեն աղջկաս հիվանդությունը բուժելու համար։ Էս անգամ էլ էլի դիմեցի ու, երբ շրջանը պտտվեց, նորից հասավ Առողջապահության նախարարություն, բարկացա, չգնացի պատասխանի հետևից, քանի որ գիտեմ՝ ինչ են ասելու»,-պատմում է կինը։

Հոկտեմբերին՝ մեր նկարահանման ժամանակ, Աննա Հակոբյանի հանձնարարականով, կինն իր աղջկա հետ գտնվում էր բուժական կլինիկայում, սակայն այստեղ բուժումները կրել են պրոֆիլակտիկ բնույթ և աղջիկը հիմնական բուժում չի ստացել։ Դուրս գալով կլինիկայից՝ կինը հանդիպել է Հակոբյանի օգնականին, ով «Իմ քայլը» դաշինքի Լոռու մարզային կառույցի մի երիտասարդի գումար է տվել և ասել, որ տուն ճարեն կնոջ համար։ Ու թեև Վանաձորի հենց կենտրոնում կարելի է ամսական ընդամենը 10 հազար դրամով վարձով տուն գտնել, սակայն երիտասարդը Շահումյանի գյուղի մի խուլ անկյունում է տուն գտել նրա համար, որը զրկված է կոմունալ հարմարություններից ու նաև խալխլված է։ Այն էլ արդեն փետրվարի մեկից տունը պետք է ազատեն։

«Աննա Հակոբյանի օգնականն է, ով է, չգիտեմ, Հայարփին է ասել, որ գտնեն տունը։ Հետո զանգել եմ, ասում եմ՝ ախր էս տանն ապրել չի լինի, գիշերները չենք կարողանում քնել, խփում են, խոհանոցում ջրի հետ կապված խնդիրներ կան, ապրելու համար անհարմար է, ինձ ասում ա՝ գլխիդ կաթո՞ւմ ա՝ չէ՛, տանիք ա՝ ապրի»,-պատմում է կինը:

Նա նկատում է, որ իր վերջին դիմում-նամակում նշել է, որ եթե գոնե չօգնեն իր աղջկա բուժման հարցերը լուծել, ապա կդիմի Ռուսաստանի նախագահ Վլադիմիր Պուտինին՝ ապաստան տալու հարցով։

Չնայած դրան՝ տիկնոջ դիմումն անտեսվել ու կառուսելի նման պտտվել է՝ դարձյալ հասնելով առողջապահություն։

Այժմ նա խնդրում է օգնել իրեն դիմել Պուտինի պաշտոնական կայքին՝ նրանից ապաստան ստանալու ակնկալիքով