«Անտիսաշիկ օպերացիան» ավարտված է, Փաշինյանն անցել է պլան «Բ»-ին (տեսանյութ)

«Իմ քայլի» ցուցակով պատգամավոր դարձած Ճանապարհային ոստիկանության պետի նախկին տեղակալ Արմեն Խաչատրյանն իր հարցազրույցում արագաչափերի հետ կապված ուշագրավ հայտարարություն է արել:

Պարզվում է՝ միֆ է այն, թե ՀՀ երրորդ նախագահ Սերժ Սարգսյանի եղբայրը՝ Ալեքսանդր Սարգսյանը՝ Սաշիկը, արագաչափերի բիզնես ունի։

Նա իր հարցազրույցի մեջ ասել է․

«Ամբողջ տեսախցիկների համակարգը՝ գույքով, տեխնիկական միջոցներով, պետության սեփականությունն է շատ վաղուց՝ դեռևս 2013 թվականից․․․Սա ոչ մեկի բիզնեսը չէ»։

Լրագրողի ճշտող հարցին, թե հերքո՞ւմ է այն լուրերը, թե Սաշիկն առնչություն ունի արագաչափերի բիզնեսի հետ, նա պատասխանել է՝ «այո»:

Այսինքն՝ ի՞նչ է ստացվում, որ կամ Նիկոլ Փաշինյանն է «մուտիլովշիկ», երբ հայտարարում էր, թե Սաշիկը «փայ» էր մտել արագաչափերի բինեսի մեջ, կամ այս ոստիկանը․․․ 

Բոլորս ենք հիշում, թե ինչպես շարժման օրերին Նիկոլ Փաշինյանը փակում էր արագաչափերն ու հայտարարում, թե «անտիսաշիկ օպերացիա» է իրականացնում։ Նրանք, ովքեր չեն հիշում՝ թարմացնենք հիշողությունը տեսանյութով։

Հարկ է նկատել, որ Փաշինյանը հանրահավաքների ժամանակ առիթը բաց չէր թողնում շահարկելու սաշիկաարագաչափային թեման և հայտարարելու, թե նա իր պատիժը կկրի։ Սակայն վարչապետ դառնալուց հետո, նա մոռացավ իր հայտարարությունների մասին, իսկ այսօր էլ «Իմ քայլ»-ական ոստիկանը հայտարարում է, թե Սաշիկը կապ չունի․․․

Մինչդեռ, դա այն նույն Սաշիկն է, որի անունը Փաշինյանը պատեհ-անպպատեհ տալիս էր իր շարքային լրագրող և ապա քաղաքական ընդդիմախոս շրջանում։ Նա, փաստորեն, այսքան ժամանակ հորինել է պատմություններ, որոնք պարզվում է՝ սուտ են եղել ու շոյել հասարակության ականջը։ Ամեն անգամ, Փաշինյանի՝ մոտավորապես «վառել Սաշիկին» հայտարարությանն ի պատասխան՝ լսվում էին սոցիալապես ճնշված ժողովրդի ծափերն ու բացականչությունները։

«Այո՜, այո՜․․․»,-գոչում էր ամբոխը։

Իհարկե, այսօր այնպես չէ, որ Սաշիկն անմեղ է, ու պիտակն էլ պարզապես նրան են կպցրել, բայց պարզվում է՝ իրավիճակ է փոխվել, որից հաստատ գոհ կլինի նաև նախկին «փայ մտնող Սաշիկը», քանի որ Փաշինյանի թիմը և հենց նա՝ ինքը, մոռացել են իրենց հայտարարությունները և Սաշիկին այլևս չեն մեղադրում։

Ու այստեղ հարց է առաջանում՝ իսկ մուգուցե Փաշինյանն այլ հարցերո՞ւմ ևս խաբել է մարդկանց, միգուցե նախկին իշխող կուսակցությունն այդքան էլ վա՞տը չէր, ինչպես փորձում էր ներկայացնել ինքը՝ Փաշինյանը։ Միգուցե դա անում էր պաշտոնի հասնելո՞ւ համար․․․ Ինչևէ, ամեն դեպքում՝ Փաշինյանի ամբոխավարական մանիպուլյացիան ու «անտիսաշիկ օպերացիան» էֆեկտ ունեցավ․ մարդիկ հավատացին, ուրախացան, հավաքվեցին ու նույնիսկ իրենց ներքնազգեստով սկսեցին արագաչափեր փակել և միանալ Փաշինյանին․․․

Այժմ «անտիսաշիկ օպերացիան» ավարտված է, Փաշինյանն անցել է պլան «Բ»-ին։

Իսկ ինչ կլինի հետո՝ թողնում ենք ընթերցողի մեկնաբանությանը, քանի որ միևնույնն է՝ այս հարցի շուրջ մեր վերլուծությունն ամբոխի սրտով չի լինի․․․

Արմինե Մկրտումյան