Թաթան համազգային է, միայն մերը չէ․ ՊԵԿ ղեկավարը՝ շոուբիզնեսյան հարկումների մասին

Պեկ ղեկավար Դավիթ Անանյանը հերքեց տարածված այն լուրերը, թե երգիչ-երգչուհիներին հարկային դաշտ բերելու հարցում արտոնություններ են լինելու։ Կառավարության նիստից հետո, պատասխանելով լրագրողների հարցին, թե ճի՞շտ են արդյոք տեղեկությունները, որ ՊԵԿ-ը հայտարարել է, թե «Թաթա Սիմոնյանը մերն է և նրան ձեռք չեն տա», Դավիթ Անանյանն ասաց, որ նման բան իրենց կողմից չի ասվել։

«Կարծում եմ՝ Թաթան համազգային է՝ ո՛չ միայն մերն է, այլև բոլորինն է, բայց եթե կարծում եք, որ մնացածների համեմատ ավելի արտոնյալ է՝ վճարել-չվճարելու առումով՝ ո՛չ, այդպիսի արտոնություն չկա, ոչ մեկ արտոնյալ չէ»,-ասաց Անանյանը։

Նրա խոսքով՝ ՊԵԿ աշխատակիցները պարբերաբար ընթացիկ այցելություններ են կատարում համապատասխան հաստատություններ և ղեկավարներին հորդորում, որ սահմանված կարգով ձևակերպեն այդ անձանց աշխատանքը։

«Այո՛, նման գործառույթներ կան և դրանք հորդորի տեսքով են լինում։ Այո՛, մենք ուզում ենք, որ շոուբիզնեսը հարկվի, և իրենք էլ դեմ չեն, որ դա լինի։ Կարծում եմ՝ մենք պետք է քննարկենք տարբերակներ, որոնք իրենք պետք է կիրառեին դեռ տարիներ առաջ, բայց կարծում եմ նաև, որ ո՛չ միայն շոուբիզնեսը պետք է հարկվի, պարզապես սկսեցինք այդտեղից, որ մշակութային գործիչներն այդ հարցում օգնեն»,-ասաց Դավիթ Անանյանը։

Հիշեցնենք, որ մամուլում շրջանառվող լուրերի համաձայն՝ ՊԵԿ-ը որոշել էր արտոնություններ տալ Թաթա Սիմոնյանին՝ ասելով, թե «Թաթան մերն ա, Թաթային ձեռք չտաք»։