Սարի թաղի փլուզումը Երևանի ճարտարապետի գործառույթում չէ, Արամի 23-ի փլուզման հարցն էլ փակված է․ Մեսչյան

Սարի թաղի փլուզված 3-րդ կարգի վթարային շենքերի հարցն ու դրանց փլուզումը անմիջապես Երևանի գլխավոր ճարտարապետ Արթուր Մեսչյանի գործառույթում չէ, բայց նա հարցը մտահոգիչ է համարում։ Այդ մասին Մեսչյանը հայտարարեց հրավիրված մամուլի ասուլիսի ժամանակ։

Նրա խոսքով` այդ հարցը նույնիսկ ավելի կարևոր է, քան Արամի 23 հասցեում տեղի ունեցած փլուզումը․

«Սարի թաղի շենքերի փլուզումն ինձ համար ավելի ցավալի հարց է, քան Արամի 23 հասցեի փլուզումը։ Մեկ-մեկ էնպես աղմուկ են բարձրացնում մի բանի համար, որ պետք չէր, իսկ կարևոր բաները մնում են ստվերի մեջ, ու հիմա էդ մարդիկ երեխաներին գրկած՝ չգիտեն՝ ուր գնան»,-ասաց Մեսչյանը՝ նկատելով, որ ծրագիր մշակում են, որով կփորձեն Սարի թաղի շենքերի հարցը լուծել։

Ինչ վերաբերում է Արամի 23-ի հարցին, ապա Արթուր Մեսչյանն այս հարցը փակված է համարում։

«Այսօր ստորագրվել է պայմանագիր Արամի քսաներեքի իրացնողի հետ, կառուցապատողը կտա 14 միլիոն դրամ, իտալացի ճարտարապետ Լուչիո Պեցցին կպատրաստի տարածքի վերականգնման նախագիծ: Ես կարծում եմ, որ բոլոր կողմերը հիմա հանգիստ կլինեն: Քաղաքապետարանն այստեղ որևէ առնչություն չունի: Իմ անձնական և քաղաքապետարանի որոշումն է, որ ոչ մի հուշարձան Երևանում չի քանդվելու: Իմ պատասխանատվությունը միայն դա է»:

Հիշեցնենք, որ Արամի 23 շենքում, որի պատը օրերս փլուզվել էր, տեղակայված է Տիգրան Հեքեքյանի գլխավորած «Հայաստանի փոքրիկ երգիչներ» երգչախումբը։ Նրանք ամիսներ շարունակ ահազանգում էին շենքի սարսափելի վիճակի մասին։

Իսկ Սարի թաղում էլ հունվարի 23-ին, փլուզվել են 18-րդ փողոցի թիվ 68 տան 1-ին հարկի երկու սյուները։