Երկու զինվորի ու երեք երեխայի մայրն ընտանիքի հետ մնացել է բաց երկնքի տակ. նրանց տունը հիմնահատակ այրվել է (լուսանկարներ)

Հունվարի 23-ին հիմնահատակ հրդեհվել է 5 զավակների միայնակ մայր Նարինե Գրիգորյանի տնակը։ Այդ մասին հայտարարություն են տարածել վերջինիս հարազատները: 

«Հրդեհի բռնկման պահին տանը եղել են 3 երեխաները՝ Միլենան (ծնվ.՝ 2004թ.), Արտաշեսը (ծնվ.՝ 2010թ.) և Լեռնիկը (ծնվ.՝ 2011թ.)։ Մայրը կարողացել է փրկել նրանց։

Նարինեի երկու որդիներն այս պահին ծառայում են ՀՀ զինված ուժերում: 

Գրիգորյանների տնակը գտնվում էր Նուբարաշենի աղբանոցին հարող տարածքում (3-րդ շենք):

Տնակն ու ներսում եղած ամեն բան վառվել են: Տնակին կից ունեն քարաշեն կիսավեր կառույց, որի փայտյա դուռն ու պատուհանը ևս այրվել են:

Ընտանիքն այս պահին ոչինչ չունի՝ ոչ մի կենցաղային իր, սնունդ, հագուստ, կոշիկ (հրդեհի պահին եղել են տնային հագուստով և հողաթափերով, միայն դրանք ունեն այս պահին):

Հարգելի՛ ԶԼՄ ներկայացուցիչներ, խնդրում եմ արձագանքել, որպեսզի այս ընտանիքին մի բանով օգնել կարողանանք: Այս պահին առաջին անհրաժեշտ իրեր փորձում ենք տեղ հասցնել։

Շնորհակալություն:

Մանրամասների համար՝ 094.00 63 37 (Արմինե) կամ 098. 88 24 30‬ (Նարինե Գրիգորյանի հարևանուհու հեռախոսահամարն է, Նարինեի հեռախոսն էլ է վառվել)»,- ասված է տարածված հայտարարության մեջ։

Այս առնչությամբ ավելի վաղ հաղորդագրություն էր տարածել նաև Արտակարգ իրավիճակների նախարարության մամուլի ծառայությունը, որում ասված էր.

«Հունվարի 23-ին, ժամը 17:33-ին «911» ծառայությանն ահազանգ էր ստացվել, որ Երևան քաղաքի Նուբարաշենի կամրջի մոտակայքում՝ աղբանոցի և խոզաբուծարանի հարևանությամբ, այրվում է բնակելի տնակ:

Դեպքի վայր է մեկնել ԱԻՆ ՓԾ հրշեջ-փրկարարական ջոկատից մեկ մարտական հաշվարկ:

Հրդեհը մեկուսացվել է ժամը 18:30-ին, մարվել՝ 18:50-ին: Փայտե տնակն ամբողջությամբ այրվել է (մոտ 40 քմ): Տուժածներ չկան»: