Իներցիայի հերթական «զոհը»․ ԿԳ նախարարը նախորդների նման պարտադրում է ընտրել իր մարդկանց

Օրերս, «Իմ քայլը» խմբակցության պատգամավոր Արսեն Ջուլֆալակյանն ընտրվել է Հայաստանի Ֆիզիկական կուլտուրայի և սպորտի պետական իստիտուտի հոգաբարձուների խորհրդի նախագահ։ Նա ֆեյսբուքյան իր էջում «սիրով տեղեկացրել է», որ ընտրվել է ՀՖՍՊԻ հոգաբարձուների խորհրդի նախագահ և ամենակարևորը՝ ընտրվել է միաձայն։

«Ընտրվել եմ միաձայն, ինչն, իհարկե, անչափ հաճելի է, բայց և միևնույն ժամանակ՝ էլ ավելի պարտավորեցնող»։

Այս իրադարձությունը գուցե մեծ ուշադրության չարժանանար մեր կողմից, եթե չլինեին որոշ անցանկալի հանգամանքներ։

Նախ, նրանց համար, ովքեր, հնարավոր է, չգիտեն՝ Արսեն Ջուլֆալակյանն Օլիմպիական խաղերի փոխչեմպիոն է, աշխարհի և Եվրոպայի չեմպիոն և հունահռոմեական ոճի ըմբիշ։ Սակայն, նույնիսկ նրա այս տիտղոսները չէին կարող հիմնավոր պատճառ հանդիսանալ՝ միաձայն անցնելու համար։

Այս ընտրությունը շատ նման էր նոր ձևավորված Ազգային ժողովի նախագահ Արարատ Միրզոյանի ընտրությանը․ վերևում որոշել էին՝ անցավ միաձայն․․․

Իհարկե, ո՛չ վարչապետի մակարդակով, բայց NEWSPRESS.am-ի տեղեկություններով, այս հարցում ևս, «վերևների» մատը խառն է եղել։ Մեր աղբյուրի փոխանցմամբ՝ ներսում մեծ մասը համաձայն չի եղել այս ընտրությանը, սակայն հակառակվել անզոր են եղել։ Գործին անմիջապես խառնված է եղել Կրթության և գիտության նախարարը։ Նա հրահանգել է բոլորին անպայման ընտրել Արսեն Ջուլֆալակյանին։

Սա այն դեպքում, երբ իր պաշտոնավարման առաջին օրերին Արայիկ Հարությունյանը քննադատում էր հանրապետականների պարտադրանքի գործելաոճն ու հայտարարում, թե իրենք երբեք յուրայիններին չեն միջնորդի պաշտոնում։

NEWSPRESS.am-ն արդեն անդրադարձել է այդ միջնորդություններից մի քանիսին, այդ թվում՝ Շենգավիթ վարչական շրջանի թաղապետի նշանակմանը։ Սակայն, եթե այլ դեպքերում նա պարզապես միջնորդել է, ապա այս դեպքում նա պարտադրել է։

Այս պարագայում չի բացառվում, որ Արայիկ Հարությունյանի թաքուն այցերը դպրոցներ, և կամ նրա՝ չգիտես որտեղից արտագրած ուսուցչի էթիկայի նորմերը, ուղղված են մի նպատակի՝ ինչ-որ պատճառով հեռացնել նախորդներին և յուրայիններին ապահովել աշխատանքով։

Այս գործելաոճը շատ նման է Հանրապետականի պահվածքին ու չի բացառվում, որ, օրինակ, ԱԺ փոխնախագահ, իմքայլական Լենա Նազարյանը դարձյալ արդարացնի կուսակիցներին ու ասի, թե իներցիայով է ստացվել․․․ սա հիշեցրեց «Հաջողության ջենթլմենները» հայտնի ֆիլմի հայտնի հերոսի արտահայտությունը․ «Все побежали, и я побежал»։ 

Եվ իրո՛ք, եթե նախորդներն արել են ու մարսել, ապա ինչո՞ւ այս իշխանությունը չի կարող անել․․․ Սա կատակ բան չէ, այլ իներցիայի օրենք է․ իներցիայով պարգևատրում են իրենք իրենց, իներցիայով նախորդների պես խլում են ձայնի և ինքնարտահայտման իրավունքը, իներցիայով իրենց շրջապատում են յուրայիններով․․․ Մի խոսքով՝ մյուսների նման, Արայիկ Հարությունյանը ևս իներցիայի «զոհ» է․․․