«Ռուբեն, հեռացիր»․ ակցիայի մասնակիցները պահանջում են Կենդանաբանական այգու տնօրենի հրաժարականը

Երևանի կենդանաբանական այգու աշխատակիցներն ու կենդանասերները պահանջում են կենդանաբանական այգու տնօրեն Ռուբեն Խաչատրյանի հրաժարականը:

«Վերջ կենդանիների ոչնչացմանը», «Ռուբեն, հեռացի՛ր» գրառմամբ պաստառներով, նրանք բողոքի ակցիա են կազմակերպել Կենդանաբանական այգու դիմաց։

Կենդանասերները վստահեցնում են, որ այգու տնօրենի անբարեխիղճ աշխատանքի հետևանքով կենդանիների զգալի անկում է գրանցվել։ Ակցիայի մասնակիցներն առաջարկում են ստեղծել կառավարման խորհուրդ, առաջադրել թեկնածուներ ու անցկացնել տնօրենի ընտրություն։

«Պետք է հնարավորություն տալ մասնագետներին և կենդանասերներին ներկայացնել իրենց տեսլականն ու ծրագրերը՝ կապված այգու բարեփոխումների հետ։ Ինչո՞ւ չէ, թող տնօրենն էլ իր ծրագրերը ներկայացնի»,-լրագրողների հետ զրուցյում ասաց ակցիայի մասնակիցներից մեկը։

Նրանց խոսքով՝ ո՛չ Երևանի քաղաքապետարանը, ո՛չ էլ այգու տնօրենը թույլ չեն տալիս, որպեսզի կենդանասերներն ակտիվ մասնակցություն ունենան կենդանիների անկման պատճառները պարզող գործընթացներին: Նրանք վստահեցնում են, որ 3 առյուծների անկումը պատահական չի եղել։

«Ինչո՞ւ պետք է նման չափի անկում գրանցվի»,-ասում է կենդանասերներից մեկն ու հավելում, որ 2018 թվականի դեկտեմբերի 20-ին քաղաքապետարանում հատուկ նիստ է հրավիրվել, որտեղ քաղաքապետի տեղակալը հորդորել է կենդանասերներին մասնակից դարձնել քննարկումներին։ Կենդանասերները զարմացած են, թե ինչու մինչ օրս քայլ չի արվել իրենց ներգրավելու քննարկումներին։

Այգգու նախկին աշխատակից Մանուկ Մանուկյանն էլ, ով հեռացվել է մի քանի օր աշխատանքի չգալու համար, նկատում է, որ տնօրենը չի կարողանում ճիշտ կառավարել և նրեդրումներ չի արել։ Միևնույն ժամանակ, նա նկատում է, որ երկու տարի շարունակ ներդրումներ է արել Երևանի քաղաքապետարանը։