Ձեռնաբաց Անանյանը աշխատավարձ ու պարգևավճար է տալիս անգամ իր կողմից ՊԵԿ-ից վռնդված աշխատակցին

ՊԵԿ նախագահի շուրջ սկանդալները շարունակվում են: Հիմա էլ պարզվում է՝ Անանյանն այնքան ձեռնաբաց ղեկավար է, որ աշխատավարձ է տալիս ՊԵԿ օպերատիվ հետախուզության վարչության պետ Կարեն Կարապետյանին, ով, ի դեպ, Անանյանին չի զիջում իր սկանդալայնությամբ: 

Բանն այն է, որ Կարապետյանը շուրջ յոթ ամիս է՝ աշխատանքի չի գնում, քանի որ ՊԵԿ նախագահ Դավիթ Անանյանն արգելել է նրա մուտքը կոմիտե, բայց ստանում է աշխատավարձ, գումարած պարգևավճարներ:

Զարմանալի է Անանյանի երկաթյա տրամաբանությունը. ինչպե՞ս կարելի է մի պաշտոնյայի աշխատասենյակի դուռը կապարակնքել, բայց և միևնույն ժամանակ, նրա անունով աշխատավարձ «նստեցնել»: Թերևս կա՛մ պետք է ունենալ աշխատանքից ազատման իրավական հիմք և վերջապես ազատվել, իր բնորոշմամբ, կաշառակեր աշխատակցից, կամ՝ թողնել աշխատի: 

Անանյանի` աշխատանքից ազատելու պատճառով այսօր Կարեն Կարապետյանը
ՊԵԿ ղեկավարի «թշնամիներից» մեկն է: Հիշեցնենք, որ Կարապետյանը ՊԵԿ օպերատիվ հետախուզության վարչության վարկաբեկված պետն է, ում մասին հրապարակումները միայն բացասական բովանդակությամբ են լինում:

Բանն այն է, որ Անանյանը, թեև ինքն էր Կարապետյանին ընդունել այդ պաշտոնին, բայց և համապատասխան գործընթաց է սկսել նրա դեմ կաշառակերության, պետական դիրքի չարաշահման և բիզնեսի հովանավորչության գործունեության մասով:

Մի խոսքով, ՊԵԿ-ում ինչ-որ բան այն չէ. Կարեն Կարապետյան-Անանյան բախումը խիստ հետաքրքրական է և թեկուզ միայն այդ բախման արդյունքում սպասվող բացահայտումները խոստումնալից են թվում:

Հիշեցնենք նաև, որ Կարեն Կարապետյանը նախորդ ռեժիմից մնացած այն պաշտոնյան է, որը մամուլի ուշադրության կենտրոնում էր հայտնվել դեռ 2014-ին՝ «Շառլոտ» սրճարանում ծեծկռտուքի դեպքից: Պնդում կա նաև, որ կաշառքի փաստերն ու միլիոնավոր ապօրինի փողերն են պատճառ դարձել ՊԵԿ համակարգից դեռևս Սերժ Սարգսյանի կառավարման ժամանակ պաշտոնից հեռացման համար:

Մի խոսքով՝ մեկը մեկին արժեն:

NEWSPRESS.am