Այդ երբվանի՞ց ԶԼՄ-ներին սկսեցին դատի տալ քրեական տարրերը

Շատերն են ամբողջ օրը համակարգչի դիմաց նստած` վատաբանում Հայաստանում գործող լրատվամիջոցներին և լրագրողներին՝ իրենց կատարած աշխատանքի համար։ Սակայն, երբ հանրային աջակցության կարիք կա, անհատ քաղաքացիները, իրավապաշտպաններն ու քաղաքացիական հասարակությունը ձկան նման համր են դառնում։

«Հետք» և aravot.am կայքերից տեղեկանում եմ, թե ինչպես է հայկական դիվանագիտական անձնագրով մի քրեական հեղինակություն՝ Ռոբսոն կեղծանվամբ, փորձում ճնշել ազատ մամուլն ու իր մասին՝ իր պատկերացմամբ` բացասական ինֆորմացիաների հոսքը փակել՝ կայքերից հեռացնելով իր մասին նյութերը։

Հավանաբար, զանգերն ու առաջարկները անտեսվելուց հետո, Ռոբսոնը որոշել է դիմել Ռոսկոմնադզորին՝ Ռուսաստանի Կապի, տեղեկատվական տեխնոլոգիաների և զանգվածային հաղորդակցության վերահսկողության ֆեդերալ ծառայությանը, և պահանջել, որ հրապարակված հոդվածները հեռացվեն կայքից 3 աշխատանքային օրվա ընթացքում, հակառակ դեպքում՝ կայքը կարգելափակվի Ռուսաստանի տարածքում: Իր այս պահանջը Ռոսկոմնադզորը հիմնավորել է Մոսկվայի Տագանսկի շրջանի դատարանի որոշմամբ, որով, իբրեւ, հաստատվել է անհատական տվյալների մշակման վերաբերյալ ՌԴ օրենսդրությունը: Ի դեպ, «Առավոտ» առցանց պարբերականն արդեն արգելափակվել է Ռուսաստանի տարածքում։

Հետաքրքիր է այստեղ Հայաստանի Արդարդատության նախարարության լռությունը, ԱԳՆ-ի խոսքը ևս չենք լսել (Ռոբսոնը Էդվարդ Նալբանդյանի խորհրդականն էր և ուներ Հայաստանի դիվանագիտական անձնագիր, որի բացահայտումն էլ հենց ծանր է տանում, Շավարշ Քոչարյանն էլ պնդում էր, թե Ռոբսոնը Սոչիի հայ համայնքին լավ աչքով է նայում), կամ գործընկեր լրատվամիջոցների ձեռնպահ դիրքորոշումը։

Ես զարմանում եմ. փաստորեն, նոր իրավիճակի պայմաններում, անգամ քրեական հեղինակություննե՞րն են դիմում իրավական համակարգին: Այդ ո՞ր օրվանից այդ աշխարհում ևս թավշյա հեղափոխություն եղավ։ Ռոբսոնը դիմել է Ռոսկոմնադզորին. զավեշտալի է։

Հումորը մի կողմ. ցավալի է, որ Հայաստանում լրատվամիջոցներն այնքան անօգնական վիճակում են գտնվում, որ կարող են մեր երկրի սահմաններից դուրս գտնվող Ռոսկոմնադզորն ու Ռոբսոնը որոշել, թե մենք Հայաստանում ի՞նչ նյութ կարող ենք գրել մեր «դիվանագետի» մասին և ստիպել մեզ հեռացնել այն։

NEWSPRESS.am-ի հիմնադիր-տնօրեն՝

Արմենուհի (Արիանա) Հովսեփյան