Այս հնարավորությունը մեզ ընձեռում է ոչ թե մենաշնորհը, այլ գիտատեխնիկական առաջընթացը. «Հուռնետ» ՍՊԸ-ի Գործադիր տնօրենի բաց նամակը

«Հուռնետ» ՍՊԸ-ի Գործադիր տնօրեն Արմեն Թովմասյանը բաց նամակ է հղել, որում անդրադարձել է անձնագրային բաժանմունքների կողքին գործող պատճենահանում, լուսանկարահանում, թարգմանություն իրականացնող կետերի անհատ ձեռներեցների բողոքին: 

Հարգելի՛ համաքաղաքացիներ,

Ստիպված եմ արձագանքել վերջին շրջանում իմ ղեկավարած ընկերության գործունեության շուրջ ծավալված աղմուկին և շահագրգիռ անձանց կողմից հնչեցված անհիմն մեղադրանքներին: Նախ և առաջ, նշեմ, որ «Հուռնետ» ՍՊԸ-ն ծավալում է իր գործունեությունը ՀՀ օրենսդրությանը համապատասխան և անհրաժեշտության դեպքում կարող եմ հրապարակել բոլոր փաստաթղթերը: Իսկ շրջանառությունը թաքցնելու մասին խոսք անգամ լինել չի կարող:

Մեր գործունեության առաջնային նպատակն է հնարավորինս մատչելի գներով և առավելագույն հարմարավետությամբ մատուցել ՀՀ քաղաքացիներին անհրաժեշտ ծառայությունները։

Ներկայումս ՀՀ քաղաքացին հնարավորություն ունի՝ անձնագրային բաժանմունքի տարածքը չլքելով, կարճ ժամանակում և ցածր ծախսերով ստանալ իրեն անհրաժեշտ բոլոր ծառայությունները: Օրինակ՝ 8 լուսանկարի դիմաց ընդամենը 500 դրամ վճարելով (նախկինում 4 լուսանկարի դիմաց 1000 և ավել դրամ վճարելու փոխարեն):

Այս հնարավորությունը մեզ ընձեռում է ոչ թե մենաշնորհը, այլ գիտատեխնիկական առաջընթացը: Նախկինում, այդ ծառայություններից օգտվելու համար քաղաքացիները ստիպված էին օգտվել անձնագրային բաժանմունքի տարածքից դուրս գտնվող մեկ կամ մի քանի տաղավարներից՝ վճարելով մի քանի անգամ ավել գումար և կորցնել ժամանակ:

Կուզեի կիսել իմ այն մտահոգությունը, որ մեզ հնչեցվող մեղադրանքների հիմքում ոչ թե ժողովրդի, այլ տնտեսվարողների սեփական շահերով մտահոգված լինելն է: Փորձ է արվում ժողովրդի բարեկեցությունը, ինչպես նաև լրատվամիջոցների թափանցիկ աշխատանքը շահարկելով, արդարացնել նշված ծառայությունների մատուցումը՝ առավել բարձր գներով: Արդյո՞ք խելամիտ է բողոքել գիտատեխնիկական առաջընթացի դեմ, երբ ներկայումս ամբողջ աշխարհում աշխատուժը փոխարինվում է առավել արդյունավետ և նվազ ծախսատար սարքավորումներով:

Կցանկանայի նաև նշել, որ իբրև թե մտահոգված լինելով ժողովրդի շահերով՝ մեղադրանքներ հնչեցնողները չեն քննարկում իրենց ծառայությունների գինը իջեցնելու որևէ տարբերակ: Մինչդեռ, նախքան մեր սարքերի հայտնվելը այդ տաղավարների ծառայությունները առանձնանում էին զգալի բարձր գներով, եթե համեմատենք այն տաղավարների հետ, որոնք նույն ծառայությունները մատուցում էին անձնագրային բաժանմունքների շրջակայքերից հեռու: Արդյո՞ք սա անբարեխղճության և անարդար մրցակցության դրսևորում չէ. բարձր գին սահմանել՝ օգտվելով իրենց տաղավարների հարմար տեղակայումից և այն հանգամանքից, որ քաղաքացուն պարզապես անհրաժեշտ են այդ ծառայությունները:

Կարծում եմ՝ ավելորդ չէ նշել, որ անձնագրային տարածքային բաժանմունքները հանդիսանում են ՀՀ դեմքը և ինչու չէ նաև այցեքարտը։ Այնտեղ են մտնում հազարավոր քաղաքացիներ թե' Հայաստանում բնակվող, թե' արտերկրից ժամանած։ Եվ շատ կարևոր է, որ նրանք այնտեղ տեսնեն ժամանակակից, մատչելի և հարմարավետ սարքավորումներ, որը առկա է նաև բոլոր զարգացած երկրներում։

Դիմում եմ ՀՀ բոլոր քաղաքացիներն և պատկան մարմիններին՝ չկորցնել զգոնությունը և օբյեկտիվորեն վերլուծել ստեղված իրավիճակը եւ առաջնորդվել բացառապես ժողովրդի շահերից։

Հարգանքներով, Ա. Թովմասյան, Գործադիր տնօրեն «Հուռնետ» ՍՊԸ