Ինչո՞ւ ընտրություններից հետո տեսախցիկները սկսեցին գործել․ տաքսու վարորդները պահանջում են կայանատեղեր և տուգանքների համաներում

Տաքսու վարորդները պահանջում են կայանատեղիներ ունենալ։ Այս մասին լրագրողների հետ հանդիպմանն ասացին մի խումբ վարորդներ, ովքեր հունվարի 23-ին իրենց խնդրով եղել են Երևանի քաղաքապետարանի դիմաց և չեն կարողացել հանդիպել քաղաքապետին։

Նրանք նկատում են, որ կայանատեղիներ չլինելու պատճառով 5000 դրամ տուգանքներ են եկել։

«Պարոն Նիկոլ Փաշինյանը՝ մեր վարչապետը, որ մենք ընտրել ենք իրան, մեզ համաներում ա շնորհել, բայց ոնց տեսնում ենք՝ քաղաքապետը չի տրամադրում կայանատեղ և ոստիկանապետ Օսիպյանն էլ մեզ տուգանում է»,-ասում է վարորդներից մեկն ու ցույց տալիս տուգանքի թղթերը։

Նա նկատում է, որ Հանրապետականի ժամանակ նույն այս տեսախցիկները գործել են, սակայն երբեք իրենց նման տուգանքներ չեն եկել։

«Չգիտեմ՝ ոնց, ընտրություններից հետո էդ տեսախցիկները սկսեցին գործել ու մենք տուգանվում ենք հիմա»,-ասում է վարորդն ու հավելում, որ իրենք պահանջում են նորից համաներում անել։

Նրանք պահանջում են նաև կայանատեղեր, որտեղ կարող են հանգիստ կայանել մեքենան և չտուգանվել։ 

«Հայկ Մարությանն ասում է՝ 100 տեղ ենք տրամադրել, էդ դուք չեք տրամադրել, էդ Տարոն Մարգարյանն է տրամադրել։ Դուք հլը ոչ մի բան էլ չեք արել, մենակ ձեզ եք պարգևավճար տրամադրել»,- նշում է վարորդն ու հավելում, որ այդ կայանատեղիները ավելացնել է հարկավոր։

«Կամ ո՞վ է որոշել էս գինը՝ 5000 դրամ։ Ինչի՞ 1000 չէ, որ 5000։ 5000 դրամ աշխատելը հե՞շտ է»։