Փաշինյանն ուզում է «փուռը տալ» իր անվտանգության աշխատակիցների՞ն

Նիկոլ Փաշինյանի նոր խոսնակ Վլադիմիր Կարապետյանը փորձել է արդարացնել իր «շեֆին»՝ հայտարարելով, որ համացանցում հայտնված տեսանյութում, երբ Փաշինյանի ավտոշարասյունը կոպտորեն խախտելով երթևեկության կանոնները՝ ընթացել է, Փաշինյանը մեքենայում չի եղել։

Իհարկե, Վլադիմիր Կարապետյանը բավական խոսել է՝ ներկայացնելով օրենսդրական դրույթներ, թե ինչպես են իրականացվում այն համապատասխան միջոցառումները, որոնք նախատեսված են վարչապետի համար՝ որպես հատուկ պետական պահպանության ենթակա անձի։

Հասկանալի է, որ խոսնակն առանց «շեֆի» հետ համաձայնեցնելու, իրավունք չունի մեկնաբանություն տալու որևէ հարցի կապակցությամբ։ Հետևաբար, օրենքները մի կողմ թողնելով՝ արձանագրենք փաստը՝ Փաշինյանն այս անգամ էլ «ջրից չոր դուրս գալու» համար որոշել է «քցել» իր անվտանգության աշխատակիցներին՝ երթևեկության կանոնների խախտումներով ընթանալու մեղքն ամբողջովին նրանց վրա բարդելով ու խոսնակի միջոցով արդարանալով՝ «ես մեղք չունեմ՝ ես մեքենայում չեմ եղել»։

Մեծ հաշվով սպասելի էր, որ ամեն հարցի հետ կապված պատասխանատվությունից խուսափող Նիկոլ Փաշինյանը նույնիսկ նման հարցերում այնքան կմանրանար, որ նման պատասխան կտար։ Ի դեպ, ամբողջ աշխարհում ընդունված պրակտիկա է պետությունների առաջին դեմքերի մոտ՝ սեփական անվտանգության համակարգի աշխատակիցների հանդեպ ունենալ ընդգծված հարգալից վերաբերմունք։

Ի լրումն՝ շատ խելք պետք չէ ունենալ՝ հասկանալու համար, որ անվտանգությունը, որն առաջին օրը չէ, ինչ աշխատում է Փաշինյանի հետ, չէր գնա նման խախտման ու վթարային իրավիճակ չէր ստեղծվի, եթե նույն «շեֆի» կողմից գոնե մեկ անգամ զգուշացված լիներ ճանապարհային երթևեկության խախտումներ թույլ չտալ: Իսկ եթե զգուշացվել է և դրանից հետո է շարասյունը խախտումներ թույլ տալիս, ապա ինչ-որ տեղ ինչ-որ բան փչացել է՝ չի աշխատում: Ինչ վերաբերում է խոսնակի՝ օրենքի կետերին հղումներ անելուն, ապա դա հիշեցնում է ՊԵԿ պարգևատրումները, երբ ամեն ինչ օրենքով է, բայց խնդիրներ կան բարոյական դաշտում... 

NEWSPRESS.am