Հայաստանն Ամերիկա չէ, և Փաշինյանն էլ Թրամփ չէ. մամուլը լռեցնելը ցավոտ կլինի հենց իշխանության համար

Նիկոլ Փաշինյանի նախկին խորհրդական Արսեն Խառատյանը բավական ընդարձակ կերպով անդրադարձել է հայկական մեդիադաշտի խնդիրներին և կոչ արել իշխանական ողջ թիմին բոյկոտել մի շարք լրատվամիջոցների։

Սա, իրոք, զարմանալի հայտարարություն է, հատկապես մի մարդուց, ով ինքն է հանդիսանում ԶԼՄ խմբագիր։ Հիշեցնենք, որ Արսեն Խառատյանը Վրաստանում հրապարակվող հայալեզու «Ալիք մեդիա» լրատվական կայքի խմբագիրն է։ Առավել զարմանալին այն է, որ նման հայտարարություն հնչում է մի թիմի հետ կապված, որի գլուխ կանգնած է նախկին լրագրող ու նախկին խմբագիր։ Դե արդեն հիշեցնելն ավելորդ է, որ Փաշինյանը եղել է լրագրող, ապա խմբագիր 7 այդ կարգավիճակում էր, մինչ ԱԺ պատգամավոր դառնալը։

Մյուս կողմից՝ տարօրինակ է այն, որ ազատ խոսքից, բազմակարծությունից, թափանցիկությունից, ժողովրդավարական արժեքներից ամեն պատեհ-անպատեհ առիթի խոսող իշխանական թիմին նման կոչ է արվում։ Տպավորություն է, որ սահուն կերպով անցում է կատարվում դեպի բռնապետություն։ Իսկ այն հիմնավորումները, որոնք բերում է Խառատյանն իր կոչն ավելի ազդեցիկ դարձնելու համար, կարելի է համարել ժամանակակից հասարակության սարսափ-միֆերի ժանրից քաղվածքներ։ Ամեն դեպքում ճիշտ կլիներ, որ Արսեն Խառատյանը նախ հիշեր տեղեկատվություն ստանալու ազատության մասին ՀՀ-ում գործող օրենսդրությունը, ապա նաև իր համար բավականին հոգեհարազատ Միացյալ Նահանգներում նախագահ Դոնալդ Թրամփի՝ լրատվամիջոցներին լռեցնելու դառը փորձերը, որոնցից յուրաքանչյուրն ավարտվել է սկանդալով։ Հայաստանն Ամերիկա չէ, և Փաշինյանն էլ Թրամփ չէ։ Ազատ մամուլի դեմ ոտնձգությունը նույնիսկ բոյկոտի տեսքով կարող է մեկ ժամում Հայաստանը դարձնել Հյուսիսային Կորեա։

Ու այստեղ արժե հիշեցնել, որ հիմնականում արտաքին ֆինանսական հոսքերից սնվող Հայաստանի համար նման վերափոխումը կլինի չափազանց ցավոտ հենց Փաշինյանի համար։ Մնացածն արդեն թող դատեն իշխանականները։ Քննադատական մամուլն այս պահին Հայաստանի համար հանդիսանում է այն էլեկտրաշոկը, որը զոմբիացված հասարակությանը «հետ է բերում» ռեալ իրականություն և ցույց տալիս կյանքն այնպես, ինչպես կա՝  Փաշինյանի լայվերից դուրս։

NEWSPRESS.am