Օսիպյանի կեցվածքը պետական գործչին վայել է

«Ես կորցրել եմ ընկերներ, եթե կորցրած չլինեի իմ գործընկերներին և ընկերներին, գուցե իմ դիրքորոշումն այլ լիներ, կարծում եմ՝ յուրաքանչյուրը պետք է կրի օրենքով նախատեսված իր պատիժը»:

Այս մասին այսօր ասաց ՀՀ ոստիկանապետ Վալերիյ Օսիպյանը՝ ՊՊԾ գնդի զավթման գործով դատարանում ցուցմունք տալու ժամանակ։

Այլ կերպ ասած՝ Օսիպյանն առարկեց, որ գործով կոնկրետ տասն ամբաստանյալների նկատմամբ համաներում կիրառվի։

Իհարկե, կարելի է մտածել, թե Օսիպյանն անձնական նկատառումներ ունի այդպես մտածելու և կամ արտահայտվելու, քանի որ վերջինիս պատանդ էին վերցրել և 7 օր շարունակ նրան, կարելի է ասել, ծաղրի արժանացրել։ Օսիպյանն ինքը այդ մասին ասաց ցուցմունք տալիս, սակայն այդ հանգամանքը չշահարկեց իր դիրքորոշման մեջ։

Ավելին՝ Օսիպյանը արժանապատիվ ու սթափ դրսևորեց իրեն անգամ, երբ նրա հասցեին ծռերի կողմնակիցները ռեպլիկներ ու վիրավորանքներ հնչեցրին։

Մասնավորապես՝Գևորգ Սաֆարյանը դահլիճից նետեց, թե «ձայնդ կտրի, լակո՛տ», սակայն Օսիպյանը մնաց անդրդվելի։

Չենք քննարկում Սաֆարյանի սխալ պահվածքը, բայց անկեղծ լինելու համար պետք է նշել նաև, որ Վալերիյ Օսիպյանն իր սթափ և զգոն պահելաձևով ժամանակին աչքի է ընկել փողոցային բախումների ժամանակ։ Նրան միշտ հաջողվել է առողջ երկխոսության մեջ մտնել ցուցարարների հետ ու գալ ընդհանուր հայտարարի։

Այն, որ խնդիրը քաղաքական բնույթ է կրում՝ երկրորդ կարծիք լինել չի կարող, իսկ որ Օսիպյանն իրեն պահեց պետական գործչին վայել կեցվածքով՝ ևս անհերքելի է։ Նա ցանկացավ ասել, որ քաղաքականության մեջ հարցերը զենքի միջոցով չեն կարող լուծվել։