Նոր իշխանությունը գողականների հետ «առևտրի» մեջ է մտել․ Մաշտոցի անձնագրայինի նոր պետը Քանաքեռցի Տույի մտերմուհին է

Մինչ Փաշինյանը հայտարարում է, թե գողական աշխարհն ու քրեական հեղինակություններն այլևս տեղ չունեն Հայաստանում, այդ աշխարհի ներկայացուցիչները շարունակում են վայելել իշխանության հովանավորությունը։ Համենայն դեպս, նրանցից որոշները շարունակում են իրենց ղեկն աջ ու ձախ պտտել այնպես, ինպես արել են մինչ օրս։

Օրինակ, NEWSPRESS.am-ի տեղեկություններով, քրեական հեղինակություն հանդիսացող Արթուր Ղազարյանը, ով հայտնի է Քանաքեռցի Տույ մականվամբ, միջնորդ է հանդիսացել Անձնագրային և վիզաների վարչության Մաշտոցի բաժանմունքի պետի նշանակման հարցում։ 

Քանի որ գողական աշխարհի ներկայացուցիչներին իշխանությունը սովորաբար «ընդառաջում է» նրանց մատուցած այլ ծառայությունների դիմաց, ուստի կարելի է ենթադրել, որ Տույը դարձել է նոր իշխանությունների «օգտագործելի գողականը», բայց դա նրա քայլերը չի արդարացնում։

Ինչպես վերևում նկատեցինք, Տույի միջնորդությամբ է Մաշտոցի բաժանմունքի պետ նշանակվել Նատալի Կոստանդյանը։

Առաջին հայացքից այս անմեղ թվացող նշանակման վրա գուցե ուշադրություն չդարձնեինք, եթե նորանշանակ պետի միջնորդը հանցագործ անցյալ չունենար, և եթե հենց այդ նշանակվողն ինքը արդար ճանապարհ լիներ անցած։

Մեր տեղեկություններով՝ Նատալի Կոստանդյանը դեռ նախկին ոստիկանապետ Վլադիմիր Գասպարյանի օրոք ազատվել է աշխատանքից՝ թերացումների պատճառով։ Եվ այսօր այնպես չի, որ նա մեղանչել է, երկրի փոխված իրավիճակը նրան սրբացրել է ու այսօր արդեն պատրաստ է ստանձնել առավել քան կոռումպացված համարվող բաժանմունքի պետի պաշտոնը։

Գուցե Տույը շահադիտական նկատառումներով է իր մտերմուհուն միջնորդել այս պաշտոնին, գուցե ունի ինչ-որ ակնկալիքներ նրա պաշտոնի հետ կապված, դա դեռ ցույց կտա ժամանակը, բայց ակնհայտ է, որ քրեական հեղինակության մասնակցությունն այս նշանակման հարցում՝ արդեն իսկ անմաքուր է և, ինչպես ասում են, այս խմորը դեռ շատ ջուր կվերցնի։

Ի դեպ, հարկ է նկատել, որ մինչ իշխանափոխությունը, Նատալի Կոստանդյանն առիթը բաց չէր թողնում սրա-նրա մոտ «պարծենալու», թե իր թիկունքին Էդուարդ Շարմազանովն է կանգանած։ Հիմա արդեն պարզ է դառնում, թե իրականում ովքեր են նրա թիկունքին, և ինչու նա մինչ այդ չէր բարձրաձայնում դրա մասին:

Այլ կերպ ասած՝ Տույը Նատալիի համար միջնորդել է Փաշինյանին։ Իսկ այն, որ Փաշինյան-Տույ հարաբերությունները, որպես այդպիսին, գոյություն ունեն, պարզ է դարձել դեռ Փաշինյանի և գործարարների հանդիպման ժամանակ, որտեղ, գուցե ի զարմանս շատերի, ներկա էր նաև Արթուր Ղազարյանը՝ Տույը:

Այնպես որ, քրեական տարրերից միայն ամպագոռգոռ հայտարարություններով չեն ազատվում, դրա համար առնվազն պետք է նրանց հետ «առևտրի» մեջ չմտնել, կամ որ նույնն է՝ ես քեզ, դու՝ ինձ առևտրային հարաբերություններ չունենալ, ինչը, Տույի պարագայում, այլևս եղել է։