ՀՔԾ-ն դեռ լուռ է. գլխավոր դերակատարի մասին խոսք չկա

Այսօր ՀՀ Հատուկ քննչական ծառայությունում Մարտի 1-ի քրեական գործի շրջանակներում վկայի կարգավիճակով հարցաքննվել է ՀՀ Առաջին նախագահ Լևոն Տեր-Պետրոսյանը:

Օրեր առաջ նույն՝ Մարտի 1-ի գործով ՀՔԾ-ում հարցաքննվել էր նաև ՀՀ 3-րդ նախագահ Սերժ Սարգսյանը:

Նրա հարցաքննությունը տևել էր 5 ժամ, իսկ Լևոն-Տեր-Պետրոսանինը՝ 1,5 ժամ, թեև ակնհայտ է, որ Մարտի 1-ի գործով ավելի երկար ասելիք ունի առաջին նախագահը:

Ինչևէ, էքս նախագահների հարցաքննությունը կարող է նոր էջ բացել Մարտի 1-ի գործում, բեկում մտցնել, եթե նախաքննական մարմինն իսկապես իրականացնի անաչառ և բազմակողմանի քննություն՝ ապացուցելով, որ Մարտի 1-ի բացահայտումը զուտ իրավական գործընթաց է և կախված չէ քաղաքական գործիչների կամքից ու տրամադրությունից, վախերից ու կապերից:

Արդեն իսկ շրջանառվում են լուրեր, որ Սերժ Սարգսյանն իր հարցաքննության ընթացքում ցուցմունք է տվել Ռոբերտ Քոչարյանի դեմ:

Կասկածից վեր է, որ Լևոն Տեր-Պետրոսյանը ևս սլաքներն ուղղել է 2-րդ նախագահի ուղղությամբ: Հավանաբար, այս զարգացումներով կանխորոշված էլ այսօր դատարանը որոշեց Ռոբերտ Քոչարյանին ազատ չարձակել կալանքից՝ նրան ստիպելով մարտի 1-ին ևս լինել կալանավայրում:

Արդյոք Հատուկ քննչական ծառայության մարտիմեկյան բացահայտումների շղթան կհասնի՞ Մարտի 1-ի առանցքային դերակատարներից մեկին՝ ՀՀ վարչապետ Նիկոլ Փաշինյանին՝ հայտնի կդառնա մոտ ապագայում:

Չի բացառվում, որ նաև ևս հրավիրվի ՀՔԾ և ցուցմունք տա, իսկ թե ում դեմ՝ արդեն իսկ պարզ է:

Չի բացառվում նաև, որ մոտ օրերս ՀՔԾ հրավիրված նախագահներից մեկի կարգավիճակը վկայից փոխվի մեղադրյալի. ամենայն հավանականությամբ, դա կլինի Սերժ Սարգսյանը:

Հիշեցնենք, որ Ռոբերտ Քոչարյանին ևս ՀՔԾ-ն հարցաքննության էր հրավիրել վկայի կարգավիճակով, սակայն 2-րդ նախագահը շատ կարճ ժամանակ անց ձեռք բերեց մեղադրյալի կարգավիճակ:

Բնականաբար, այս խաղից դուրս կմնան Լևոն Տեր-Պետրոսյանն ու Նիկոլ Փաշինյանը, քանի որ այդպես է որոշել քաղաքականությունը:

NEWSPRESS.am