Ախր ինչո՞ւ եք ինքներդ ձեզ ծիծաղելի վիճակի մեջ գցում․ Արագածոտնի մարզպետի անհեթեթ արդարացումները

Իսկ դուք հետաքրքրվե՞լ եք՝ էդ պարգևատրված աշխատողներն ինչ աշխատանք են արել այս ամիսների ընթացքում, ի՞նչ գրաֆիկով են աշխատել։ Պարգևավճարի մասին լրագրողների հարցից վրդովված ասաց Արագածոտնի մարզպետ Դավիթ Գևորգյանը։

Լրագրողի ճշտող հարցին, թե ի՞նչ են արել այդ մարդիկ, որ ավելի լավ են արել, մարզպետը պատասխանեց․ «Կոնկրետ զբաղվել են իրենց գործառույթով»․․․

Իհարկե, հնարավոր է՝ Արագածոտնի մարզպետը չգիտի, որ մարդիկ, սովորաբար, իրենց գործառույթով զբաղվելու համար ո՛չ թե պարգևավճար, այլ աշխատավարձ են ստանում, շատ դեպքերում՝ չնչին աշխատավարձ: 

Տրամաբանական է, որ նրա պատասխանը ամենևին էլ համոզիչ չէր։ Թեև մարզպետը կաշվից դուրս էր գալիս հիմնավորելու իր հայտարարությունը, բայց ամեն մի նոր արտահայտություն հակադարձում էր նախորդին։

Մասնավորապես, հարցին, թե կոնկրետ ի՞նչ գործառույթ են իրականացրել, որ շատ լավ է ստացվել աշխատանքը՝ մարզպետը նկատեց, որ վերջին 3 ամսում Աշտարակի հիվանդանոցում բավականին լուրջ բարեփոխումներ են եղել․ կամ ինչպես մարզպետն ինքն է ասում՝ «հեղափոխական բարեփոխումներ»․․․

Իհարկե, այս հանգամանքը կարող էր համոզել լրագրողներին, սակայն այդ բարեփոխումները ո՛չ սարքավորումների ավելացում է, ո՛չ աշխատավարձի բարձրացում ու ո՛չ էլ նոր մասնագետների համալրում։ Պարզապես, մարզպետի խոսքով, աշխատողները ավելի լավ են սպասարկել․․․

Այստեղ, իհարկե, հարց է առաջանում, թե այդ դեպքում բուժաշխատողների լավ աշխատանքի համար ինչո՞ւ պետք է պարգևատրվեին մարզպետարանի աշխատակիցները։ Եվ, առհասարակ, ինչո՞ւ, օրինակ, իրենց գործառույթները լավ իրականացնելու համար չպարգևատրվեցին ուսուցիչներն ու բուժաշխատողները։ Այս հարցին մարզպետը պատասխանում է․

«Ես կարող եմ ասել միայն աշխատավարձի և ֆոնդի տնօրինման մասին, որը ես եմ տնօրինում, ուսուցիչների աշխատավարձն ու պարգևավճարները տնօրինում են դպրոցի տնօրենները»․․․

Փաստորեն, մարզպետը տեղյակ չէ նաև, որ մարզի լավագույն ուսուցիչները ևս կարող են պարգևատրվել մարզպետի կողմից։ Նախադեպ կա, երբ ուսուցիչները հատուկ հրավիրվել են մարզպետարան, ու բացի կրթության նախարարության պարգևատրումներից, գնահատվել են նաև մարզպետի կողմից։ Բայց մեր նորաթուխը դա հազիվ իմանա։

Դավիթ Գևորգյանը նաև խիստ «խիստ անհանգստացած է» մարզպետարանի հավաքարարների աշխատավարձով․

«Բա էդ կանայք, 55 հազար դրամով երկու հարկ են մաքրում՝ պարգևավճար չտա՞մ»․․․

Իհարկե, սա լուրջ արդարացում կարող էր հանդիսանալ մարզպետի համար, եթե չլիներ հենց իր կողմից մինչ այդ արված նախորդ հայտարարությունը, թե մարզպետարանի աշխատավարձերն ու պարգևատրումները որոշողն ինքն է։

Բա, եթե այդքանը հասկանում եք, պարո՛ն մարզպետ, ինչո՞ւ այդ չարչարվող կանանց աշխատավարձը չեք բարձրացնում։

Տարրական հաշվարկ է, եթե մարզպետարանի ֆինանսները սուղ են և բյուջեն չի ներում, ապա մարզպետը կարող էր պարզապես իր օգնականներին և հենց ինքն իրեն տրամատրած գումարը բաժանել տարվա կտրվածքով միջին աշխատավարձի չափի և այդ կանանց նորմալ աշխատավարձ տալ։ Բայց փողի տենչը մեծ է եղել, ու զուր արդարանալ, թե լավ ենք աշխատել կամ առավելևս ասել, թե ամենքս մեր գործառույթն ենք իրականացրել, անհեթեթություն է։ Ախր ինչո՞ւ եք դուք ինքներդ ձեզ ծիծաղելի վիճակի մեջ գցում։

Հա՛․ ի դեպ, գովազդային ընդմիջման կարգով․ այս պահին մարզպետը 80 հազար դրամ աշխատավարձով վարորդ է ուզում, բայց չի գտնում․ ցանկացողներ կա՞ն․․․

Արմինե Մկրտումյան