«Թաղեմ ձեզ, ի՛մ երկիրն ա, կուզեմ՝ հրապարակի գորգի վրա առևտուր կանեմ». «դըմփ-դըմփ հու»

Չգիտես ինչու, «Իմ քայլը» խմբակցության պատգամավոր Սիսակ Գաբրիելյանին զարմացրել է փողոցում առևտուր անող կնոջ խոսքը, ով ասել է, թե սա իր երկիրն է և որտեղ ուզի՝ առևտուր կանի:

Կնոջը տարածք են առաջարկել Երրորդ մասի շուկայում, սակայն հաշվի առնելով, որ այդտեղ առևտուրն այնքան էլ լավ չի իրականացվում և մի շարք այլ հանգամանքներ՝ նա չի համաձայնել: Կնոջ խոսքերն ԱԺ նիստի ժամանակ վարչապետ Նիկոլ Փաշինյանին փոխանցեց Սիսակ Գաբրիելյանը:

«Ես մի քիչ խմբագրած ասեմ. էդ կինն ասաց՝ թաղեմ ձեզ էլ, ձեր երկիրն էլ. ի՛մ երկիրն ա՝ կուզեմ, կգնամ հրապարակի գորգի վրա առևտուր կանեմ»:

Գաբրիելյանը, հավանաբար, չհասկացավ, որ այս հարցը կամ դիտարկումը վարչապետին չէր կարելի ուղղել, որ ստեղծված իրավիճակի մեղավորը հենց Փաշինյանն է, քանի որ հենց նա է նման իրավիճակ ստեղծել, սուտ խոսոտւմներ տվել, կամ տվել խոստումներ, որոնց պատասխանատվությունը նա այսօր չի կրում:

Իհարկե, ինչպես և կարելի էր կանխատեսել, Փաշինյանն առանանձնահատուկ չանդրադարձավ էլ այս հարցին: Նա այլևս ո՛չ թե ընդդիմախոս Նիկոլ Փաշինյանն է, ով բարձրախոսով դեմ էր արտահայտվում փողոցային առևտուրն արգելողներին, այլ նոր Փաշինյանը, ով արգելում է այն:

Մի կողմից առանձին հարց է, թե որքանով է ճիշտ կամ սխալ փողոցային առևտուրը: Մյուս կողմից էլ գուցե ամեն ինչ այսքան աչք չծակեր, եթե Փաշինյանը հենց շարժման օրերին հանդես եկած չլիներ կոչով, թե

«երկիրը տերը ժողովուրդն է, դուք եք երկրի տերը, ոչ ոք ձեզ չի կարող ասել, թե որտեղ ու ինչպես պետք է առևտուր անեք. դո՛ւք պետք է որոշեք՝ որտեղ առևտուր անեք ու ոնց առևտուր անեք»...

Նրա այս հայտարարությունն ամբոխի կողմից բուռն ծափահարությունների ու «այո»-ների արժանացան: Չի բացառվում, որ հրապարակի գորգի վրա առևտուր իրականացնելու ցանկություն ունեցող այդ կինն էլ մեծ հույսեր է կապել ու այդ օրը բոլորից բարձր է գոռացել իր «այո»-ն, բոլորից բարձր է ծափահարել ու թմբուկի «դըմփ-դըմփ»-ից հետո ասել իր «հու»-ն ...

Ու հիմա Փաշինյանը ԱԺ ամբիոնից ասում է.

«Նայում է փողոցային առևտրականների բողոքը հեռուստացույցով, ասում են՝ «բա սրա համա՞ր ենք հեղափոխություն արել»: Դե իհարկե, մենք հեղափոխություն ենք արել, որ Երևանը դառնա Ստամբուլի բազար, Մաշտոցի պողոտան դառնա արևելյան բազար, բա ուրիշ ինչի՞ համար ենք արել հեղափոխությունը»...

Ո՛չ, իհարկե մենք «բազար» սարքելու երկիր չունենք, բայց նորից կրկնենք, որ այստեղ փողոցային առևտրի ճիշտ ու սխալ լինելու հարցը չէ դրված, այլ այն, որ Փաշինյանը նաև իր այս խոստումով էր մարդկանց հրապարակ բերել ու փողոց փակել տվել, իսկ այսօր փաստորեն պարզվում է, որ այդ մարդիկ խաբված են, նրա խոսքերը փուչիկ էին, քանի որ ո՛չ թե ժողովուրդն է որոշելու, թե ինչպես առևտուր անի և որտեղ, այլ նրա փոխարեն դա արդեն կանխորոշել են: Ու փաստորեն, որքան էլ դժվար է խոստովանել, բայց ստացվում է, որ սա «ձեր» երկրը չէ, սա «իրենց» երկիրն է...

Ա. Սահակյան