Ներքին հրահա՞նգ, թե՞ ներքին վախ. Տեառնընդառաջին որոշ դպրոցների տնօրեններ քահանա չեն հրավիրել

Հայ Առաքելական Եկեղեցին ամեն տարի Քրիստոսի Սուրբ Ծննդյան օրվանից 40 օր հետո՝ փետրվարի 13-14-ին, նշում է քառասուն օրական մանուկ Հիսուսին տաճարին ընծայաբերելու տոնը՝ Տեառնընդառաջը։

Այս տոնը նշում են թե՛ մանկական հիմնարկներում, թե՛ դպրոցներում:

Մինչ օրս, կրթօջախներում տոնին հրավիրվել են նաև եկեղեցու սպասավորներ, քահանաներ, ովքեր քրիստոնեական ավանդությամբ, իրենց օրհնություն են բերում դպրոց:

Այս տարի տոնը դարձյալ նշվեց դպրոցներում մեկ բացառությամբ՝ չկային քահանաները:

NEWSPRESS.am-ին  չհաջողվեց հստակ իմանալ կա՞ արդյոք Կրթության նախարարությունից ներքին հրահանգ քահանաներին չհրավիրելու համար, թե՞ դա տնօրենների նախաձեռնությունն է եղել:

Մեր տեղեկություններով՝ «վերևներից» ներքին հրահանգ եղել է, սակայն մյուս կողմից էլ այնուամենայնիվ կան դպրոցներ, որոնք հրավիրում են քահանաներին:

NEWSPRESS.am-ի հետ զրույցում քահանա Տեր Եփրեմ Հարությունյանը նկատեց, որ կոնկրետ ինքը հրավիրված է դպրոց՝ մասնակցելու Սուրբ Սարգսի տոնին:

Նա չբացառեց, որ հնարավոր է լինի ներքին հրահանգ, սակայն նկատեց նաև, որ կապված Արարատի մարզի Այգեստան գյուղի դպրոցում հոգևորականի և ԿԳ նախարարի տեղի ունեցած միջադեպի հետ՝ հնարավոր է տնօրեններն իրենք չեն ուզում ավելորդ խնդիրներ ունենալ:

Կա հրահանգ, թե չկա՝ այսօր արդեն դա էլ չէ խնդիրը, այլ այն, որ տնօրեններն իրենք, խուսափելով ԿԳՆ-ի հետ անախորժություններից, պարզապես գլուխները չեն ուզում ցավի տակ դնել, իսկ սա արդեն  արատավոր երևույթ է և մտավախաություն, որ վախի ու լարվածության մթնոլորտում եկեղեցին սկսում է հեռնալ դպրոցից: