Աննա Հակոբյանն ինտենսիվ կերպով բարեկամներին պաշտոններ է ընծայում

Առաջին հայացքից խոնարհ, աչքերը կախ քայլող, ցածր ձայնով խոսող առաջին տիկինը՝ Աննա Հակոբյանը, բավականին լուրջ, հզոր ազդեցություն ունի այսօր մեր պետական կառավարման համակարգում:

Օդում առկախված լուրերի համաձայն, բարձր պպաշտոն ստանալիս, ամենաբարդ քննությունն Աննա Հակոբյանի մոտ ստանալն է, լիկվիդ մնացածներն էլ հիմնականում վերահանձնելու շանսեր չեն ունենում:

Չնայած՝ այս ընթացքում Աննա Հակոբյանը հասցրել է իր բարեկամ-հարազատներին այս կամ այն պաշտոնի «նշանակելիս բռնվել» ու սկանդալի մեջ հայտնվել, անկեղծ ասած, ոչ այդքան սկանդալ, որքան մամուլի կողմից հերթական արձանագրում, թե Հակոբյանը կրկին իր մտերմին է առաջ բրդում:

Մեծ սիրտ ունեցող սույն տիկինին հաջողվեց եղբորդը՝ դերասան Հրաչ Հակոբյանին խորհրդարան բրդել (ով, ի դեպ, պատգամավոր ընտրվելիս չէր ուզում թատրոնը թողնել, բայց խորհրդարանական կրկեսում կարծես իրեն վատ չի զգում), օգնականին՝ Հակոբ Սիմիդյանին՝ կրկին ուղարկեց խորհրդարան, իր հեռավոր բարեկամ Երջանիկ Հակոբյանին ևս մանդատ բաշխեց, նրան հաջողվեց իր վարսավիրին՝ Սոֆյա Նավասարդյանին ՀՀ վարչապետի աշխատակազմի արարողակարգի բաժնի խորհրդական, կառուցվածքային ստորաբաժանումներում առանձին գործառութներ համակարգող նշանակել, որպեսզի այս կինը մշտապես կարողանա արտասահմանյան այցերում իրենց ուղեկցել, ապա նաև հոգաց Մալաթիա-Սեբաստիա վարչական շրջանի ղեկավարի պաշտոնում իր հավանությանն արժանացած Դավիթ Կարապետյանի նշանակման հարցը:

Այս ամենին մեր առանձին հրապարակումներում արդեն հասցրել ենք անդրադառնալ, հերթն այսօր Աննա Հակոբյանի և ՊԵԿ նախագահի տեղակալ Ռաֆիկ Մաշադյանի բարեկամական կապին է վերաբերվում:

Հիշեցնենք՝ Ռաֆիկ Մաշադյանը ՊԵԿ նախագահ Դավիթ Անանյանի առաջին տեղակալն էր, ով պարգևավճարների սկանդալի ժամանակ ավելի շատ հայտնի դարձավ այն հանգամանքով, որ շեֆից բարձր պարգևավճար էր ստացել՝ 9 մլն. 60 000 դրամ: Ռաֆիկ Մաշադյանի տակավին երիտասարդ, բայց միլիոնատեր որդին՝ Հարություն Մաշադյանը, օրերս, ավելի կոնկրետ՝ փետրվարի 4-ին նշանակվել է Երևանի կայազորի զինվորական դատախազության դատախազ:

Պաշտոնը ստանձնելու պահին կրտսեր Մաշադյանը, ով ընդամենը 23 տարեկան է, հայտարարագրել է 12 միլիոն դրամ, 130 հազար դոլար և Volkswagen touareg մակնիշի ավտոմեքենա։

Աննա Հակոբյանի գրասենյակից ԶԼՄ-ներին տրամադրել են ինֆորմացիա, որ Ռաֆիկ Մաշադյանը Աննա Հակոբյանի խորթ մորաքրոջ թոռն է: Սակայն նրան վերջին անգամ տեսել է 2010 թվականին՝ հարազատներից մեկի հուղարկավորության ժամանակ:

Աննա Հակոբյանը փորձել է բարեկամական կապի մասին տեղեկությունն ամեն կերպ սվաղել և շեշտել, որ այդ կապը չի ազդել հայր և որդի Մաշադյանների մասնագիտական առաջխաղացումների վրա:

«Ամուսինս՝ ՀՀ վարչապետ Նիկոլ Փաշինյանը, մինչև վարչապետ դառնալը, երբևէ Ռաֆիկ Մաշադյանին հանդիպելու առիթ չի ունեցել, Մաշադյանին ՊԵԿ նախագահի տեղակալի պաշտոնում նշանակելու պահին գաղափար անգամ չի ունեցել նման կապի գոյության մասին»,- հայտնել են Հակոբյանի գրասենյակից:

Պետք է նկատել, որ Աննա Հակոբյանն իր ձեռքի տակ է վերցնում ամենատարբեր ոլորտները և հասցնում իր կուրացիայի տակ պահել կադրերի առաջխաղացումը ամենայն բծախնդրությամբ, թեպետ երբևէ առիթը բաց չի թողնում ասելու, թե իր ամուսնու գործերի մեջ չի խառնվում:

NEWSPRESS.am