Շատ բարդ է լինելու Միքայել Մինասյանին դիրքավորվել՝ ակտիվ քաղաքականություն մտնելուց հետո

Մամուլում լուրեր են պտտվում, որ առաջիկայում ակտիվ քաղաքականություն է մուտք գործելու ՀՀ երրորդ նախագահ Սերժ Սարգսյանի փեսա, Վատիկանում ՀՀ նախկին դեսպան Միքայել Մինասյանը, ով մինչև բոլորովին վերջերս հանդիսանում էր Հայաստանի մեդիադաշտի հիմնական խաղացողներից մեկը իր «Պանարմենիան մեդիա գրուպ» հոլգինդով։

Ըստ նույն լուրերի՝ Մինասյանը մտադրություն ունի քաղաքականություն մտնել վերջերս ՀՀԿ-ից առանձնացած Սամվել Ֆարմանյան, Միհրան Հակոբյան, Կարեն Բեքարյան, Արման Սաղաթելյան քառյակով և նրանց վերահսկած «Քառյակ մեդիայի» ռեսուրսներով։

Խոսվում է, որ գարնանը կգրանցվի նոր կուսակցություն։ Թե ինչքանով է հնարավոր այս կոմբինացիան և ինչ հաջողության այն կհասնի, դժվար է ասել։ Անկախ ամեն ինչից, ժողովրդի մեջ բավական թարմ և բավական ուժեղ է նեգատիվը նախ Սերժ Սարգսյանի հանդեպ և ապա Հանրապետական կուսակցության հանդեպ։ Բացի այդ էլ, անկախ սխալներից, թերացումներից կիքսերից, ժողովրդի բավական լուրջ զանգվածի մոտ դեռ բավական բարձր է Նիկոլ Փաշինյանի ռեյտինգը։

Այստեղ նախ Միքայել Մինասյանը պետք է կարողանա այնպիսի ռազմավարությամբ շարժվել առաջ, որպեսզի իրեն լրիվ զերծ պահի Սերժ Սարգսյանից, և երկրորդ՝ հայտնի քառյակը արդյոք կկարողանա այնպես ներկայանալ հասարակությանը, որ ՀՀԿ-ի հետ անհարկի ասոցացումներից խուսափի՝ որպես նախկին իշխանություն: Ամեն դեպքում, հասարակության մոտ այդպիսին է ընկալումը, և դրանից չես փախչի։

Իհարկե, մեդիա ռեսուրսներով՝ հեռուստատեսություն, ռադիո, կայք և այլն, կարելի է նման ռեբրենդինգի գնալ, սակայն դա կարելի է միայն բավական լուրջ քաղաքական հասունություն և քաղաքական գիտակցություն ունեցող հասարակություններում, մինչդեռ «կյանքիդ մեռնեմ, Նիկոլ ջան», «դու մեր թագավորն ես, Նիկոլ ջան» կամ «Նիկոլը մեր թագավորն է, իսկ Աննան՝ թագուհին» կարգախոսներով ապրող ու առաջ գնացող հասարակությունում, որպիսին հայաստանյանն է, նման ռեբրենդինգը բավական խոցելի է։ Էլ չասենք, որ քաղաքական առումով հասուն զանգվածը մեզ մոտ բավական փոքրաթիվ է ու չի կարող դիմակայել պատկերավոր ասած՝ «զոմբիների բանակին», եթե իհարկե խոսքն այս դեպքում չի լինելու երկարատև խրամատային քաղաքական պատերազմի մասին։

NEWSPRESS.am