«Պարո՛ն վարչապետ, հերիք ու բոլ եղավ, պարզեք՝ ով է Զնդոյին քողարկում»․ Արշալույսում լարված իրավիճակ է

Արմավիրի մարզի Արշալույս գյուղում իրավիճակը շարունակվում է լարված մնալ։ Իշխանափոխությունից հետո, բոլորը հույս ունեին, որ գյուղապետ Զարզանդ Գրիգորյանը կհեռանա պաշտոնից։ Սակայն ժամանակը ցույց տվեց, որ նրան ոչ ոք չի պատրաստվում ազատել աշխատանքից։

Տարիներ շարունակ գյուղացիներն ապրել են վախի մթնոլորտում ու հիմա պահանջում են գյուղապետի հրաժարականը։ Նախորդ տարեվերջին բախումներից խուսափելու և ժողովրդին ընդառաջ գնալու համար Զարզանդ Գրիգորյանը հրաժարական տվեց, սակայն 7 օրվա ընթացքում նա հետ վերցրեց հրաժարականի դիմումը։

Այժմ գյուղապետարանի դիմաց հավաքվել են մարդիկ, ովքեր դարձյալ նրա հրաժարականն են պահանջում։ Իրավիճակը վերահսկում են ոստիկանները։

«Հրաժարական էր տվել, ինչի՞ հետ վերցրեց դիմումը։ Մենք չենք թողնելու աշխատի․ ինչ ասես, որ չի արել մեզ։ Մարզպետարան են դիմել՝ լուռ են, պատասխան չկա։ Չենք հասկանում, թե էս ինչի են հովանավորում Զարզանդին»,- ասում է գյուղացիներից մեկը։

Նրանք պատմում են` ինչպես է սպառնալիքների ներքո նա գյուղացիներին պահել իր տիրապետության տակ։ Գյուղի բնակիչները վստահեցնում են, որ այսօր իրենցից յուրաքանչյուրը պոտենցյալ գյուղապետ է․ «Բոլորը, բացի Զարզանդից, կարող են սրտացավ աշխատել»,- վստահեցնում են գյուղացիները։

Նրանք ստորագրահավաք են կազմակերպել, որի տակ իր ստորագրությամբ գյուղապետի հրաժարականն է պահանջել 790 մարդ։ 

Հավաքվածները ձվերով խփել են Զարզանդ Գրիգորյանի աշխատակցուհու ավտոմեքենային։

«Զնդո, նամուս ունեցիր։ Պարո՛ն վարչապետ, հերիք ու բոլ եղավ, բոլորին պատասխանատվության ենթարկեք, ով Զնդոյին քողարկում է»,- ասացին գյուղացիները։

Նրանք վստահեցնում են, որ այնքան ժամանակ գյուղապետարանի մուտքը կփակեն, մինչև Զարզանդ Գրիգորյանին կհեռացնեն պաշտոնից։