Ինչ օրակարգով է Արամ Ա-ն Երևանում

Մեծի Տանն Կիլիկիո կաթողիկոսության մամուլի ծառայությունը տեղեկացրել է, որ այսօր Հայաստան է ժամանում Արամ Ա Մեծի Տանն Կիլիկիո կաթողիկոսը։

ՀՀ ԱԺ արտահերթ ընտրություններից հետո սա առաջին այցն է, որ Արամ Ա-ն կատարում է դեպի Հայաստան։ Ըստ տարածված հայտարարության, նա Երևանում լինելու է երեք օր, որի ընթացքում հանդիպումներ է ունենալու ՀՀ նախագահ Արմեն Սարգսյանի, վարչապետ Նիկոլ Փաշինյանի և Ամենայն Հայոց կաթողիկոս Գարեգին Բ-ի հետ։

Այցը հետաքրքրական է այնքանով, որ հեղափոխական առաջին ալիքից հետո առաջին անգամն է, որ Սփյուռքի հոգևոր-ազգային կյանքի հիմնական առանցքներից մեկը հանդիսացող գործիչը ժամանում է Հայաստան։ Իհարկե, աչքաթող չպետք է անել նաև, որ Արամ Ա-ի այցը լինում է մի իրավիճակում, երբ ՀՅԴ-ն, որի հետ սերտ հարաբերություններ ունի Մեծի Տանն Կիլիկիո կաթողիկոսությունը, այլևս իշխանական ուժ չէ և նույնիսկ արտախորհրդարանական է։

Մյուս կողմից էլ, Նիկոլ Փաշինյանի ձեռնարկած կառավարության կառուցվածքային բարեփոխումների շրջանակում Սփյուռքի նախարարությունն է վերանում, որի հետ կապված՝ Արամ Ա-ն արդեն մեկ կամ մի քանի անգամ իր հանրային ելույթների ժամանակ մտահոգություն է հայտնել։ Իսկ ահա նոր ստեղծվելիք Սփյուռքի հարցերով գլխավոր հանձնակատարի պաշտոնի համար էլ քիչ է՝ թեժ պայքար է գնում Երևանում, մի բան էլ՝ հնարավոր թեկնածուների մեջ կան Մոսկվայի համար անցանկալի մարդիկ, իսկ Մեծի Տանն Կիլիկիո կաթողիկոսությունը Մերձավոր-Արևելյան ներկայիս բարդ պայմաններում՝ ի դեմս Մոսկվայի, հայտարարել է, որ տեսնում է խաղաղության գրավականը։ Ինչպես երևում է, բավական հետաքրքիր քննարկումների օրակարգ կա բարձրաստիճան եկեղեցականի և Հայաստանի քաղաքական ղեկավարության միջև։