Արաբկիրի թաղապետը «թեժացրել է» սառեցված շինարարության հարցը․ Գուլակյանի շենքերի բնակիչներն ահազանգում են

«Քանի ես և Տարոն Մարգարյանը այստեղ աշխատում ենք, շինարարություն թույլ չենք տա»։ Այս մասին 2015 թվականին հայտարարել էր Արաբկիր վարչական շրջանի ղեկավար Հրայր Անտոնյանը, երբ բնակիչներն ահազանգել են, թե իրենց բակում ապօրինաշինություն են պատրաստվում իրականացնել։

Այդ օրից ի վեր, շինարարության հարցը սառեցվել էր, և բնակիչները գոհ էին, սակայն այսօր արդեն իրավիճակ է փոխվել։ Փոխվել է իշխանությունը, և շինարարություն նախաձեռնող սեփականատերը հույս է սկսել տածել, որ 2015-ին սառեցված հարցը դարձյալ կարող է թեժացնել։

Խնդիրն այն է, որ 4 տարի առաջ Գուլակյան 14 և 16 շենքերը ժամանակին սպասարկող կաթսայատան փոխարեն, ոմն բնակչուհի Մելանյա Զաքարյանը որոշել է շինություն կառուցել։

Թիվ 16 շենքի բնակիչներից տիկին Զոյան NEWSPRESS.am-ի հետ զրույցում պատմում է, որ դեռ 2005 թվականին կաթսայատան շենքն օտարվել է։ Այս ամենը, սակայն, տեղի է ունեցել խաբեությամբ։ Այն ժամանակ բնակիչներին ասել են, թե իբր կաթսայատունը որպես հացի փուռ են ուզում գործարկել։ Բնակիչներն էլ մտածել են՝ ավելի լավ է հացի փուռ, քան չգործող կաթսայատուն և իրենց ստորագրություններով, ըստ էության, վաճառել են կաթսայատունը։

Այսօր արդեն նոր սեփականատեր Մելանյա Զաքարյանը, ով շենքը ձեռք է բերել 15 մլն դրամով, որոշել է բարձրահարկ կառուցել։ 

2015 թվականին սեփականատեր Զաքարյանը ոստիկանների ուղեկցությամբ եկել է և փորձել քանդել տալ կաթսայատունը՝ շինարարություն սկսելու համար։ Սակայն հանդիպել է բնակիչների դիմադրությանը։ Վերջիններս դիմել են քաղաքապետ Տարոն Մարգարյանին, ով թույլ չի տվել շինարարություն իրականացնել։ 

Այստեղ կա մի քանի խնդիր․․․

Կաթսայատան փլուզումը կխալխլի կողքի բնակելիների հիմքը, իսկ արդեն նոր շինությունն էլ ամբողջովին կփակի երկու շենքերի մուտքերն այնպես, որ նույնիսկ անհրաժեշտության դեպքում շտապօգնության և հրշեջ մեքենաները չեն կարող մոտենալ։

Այս հարցով բնակիչները դիմել են նոր իշխանությանը, մասնավորապես՝ Արաբկիրի թաղապետ Արամ Դանելյանին, սակայն վերջինս՝ վարչական շրջանի ճարտարապետի հետ միասին, բնակիչներին հույս չի տվել և հայտարարել է, թե այդ տարածքում իրավունք կա նման շինություն կառուցելու։

Թե այդ դեպքում, ինչո՞ւ նախկին իշխանությունը դա որակել է որպես ապօրինաշինություն, NEWSPRESS.am-ը փորձեց պարզել հենց թաղապետից, սակայն այդպես էլ չհաջողվեց կապ հասաստել նրա հետ․ թաղապետարանի բոլոր բաժիններից մեզ հորդորեցին զանգահարել հենց ընդունարան, որպեսզի թաղապետը պատասխանի, իսկ ընդունարանի հեռախոսի զանգերին այդպես էլ ոչ ոք չարձագանքեց։

Փոխարենը մեր զանգին անմիջապես արձագանքեց  Երևանի գլխավոր ճարտարապետ Արթուր Մեսչյանը։ Նա մեզ հետ զրույցում նկատեց, որ նման ահազանգերը շատ են, բայց խոստացավ ձեռնամուխ լինել խնդրի լուծմանը։

«Ես հիմա կհանձնարարեմ, որ ուսումնասիրեն խնդիրը՝ արդյոք կարելի՞ է այդ վայրում շինարարություն իրականացնել, թե՞ դա անօրինական է ու պետք է արգելել, որից հետո արդեն կարող եմ նաև խնդրի շուրջ կոնկրետ խոսել»,-պատասխանեց Մեսչյանը։