Խնդրում եմ՝ մի անձնավորեք այդ հարցը, Քոչարյանը նաև շատ դրական գործեր է արել. Վանեցյան

Դատի տալը ցանկացած քաղաքացու սահմանադրական իրավունքն է: Պարոն Քոչարյանը, իհարկե, կարող է դատի տալ, և դատարանը կորոշի՝ մեղավոր ենք, թե մեղավոր չենք: Այդ մասին այսօր կառավարության նիստից հետո՝ լրագրողների հետ ճեպազրույցում ասաց ԱԱԾ տնօրեն Արթուր Վանեցյանը: 

«Քաղաքական հետապնդման որևէ բան չկա: Մեր հաղորդագրությունը տեսել եք առավել օբյեկտիվ ներկայացրել եք: Առհասարակ մենք չէինք ուզում որևէ հաղորդագրություն տարածել: Նախաձեռնությունը եղավ իրենց կողմից: Ես կարճ պարզաբանում էի տվել, դրանից հետո իրենք ծավալուն ելույթով հանդես եկան, և մենք ստիպված էինք արձագանքել»,- ասաց Վանեցյանը: 

Մանրամասնելով իր դեմ ներկայացված քաղհայցը՝ Վանեցյանը նշեց, որ դա եղել իր հայտնի արտահայտության կապակցությամբ, որից անմիջապես հետո լրագրողի հետ զրույցում ասել է, որ իր խոսքը եղել է ոչ այդքան ճիշտ ձևակերպված, որի համար պարզաբանում է տվել.

«Այսինքն՝ ինչի համար դիմել էին դատարան, ես դա ի սկզբանե հերքել եմ: Այդ իսկ պատճառով դատական գործը գնում է, իրավաբանները, փաստաբաններն աշխատում են, թող աշխատեն, դատարանը որոշում կայացնի: Անմեղության կանխավարկած չի խախտվել, անմեղության կանխավարկած խախտվելու որևէ բան չկա: Քննչական դեպարտամենտի ներկայացված հաղորդագրության մեջ նշված են այն հանգամանքները որը հիմք է տվել հարուցել քրեական գործ և մեղադրանք առաջադրել»: 

Լրագրողի հարցին, թե երբ Վանեցյանն ասում էր Քոչարյանների ընտանիք, նկատի ունե՞ր Սեդրակ Քոչարյանին, Վանեցյանը պատասխանեց, որ Քոչարյանների ընտանիքի մեջ մտնում են ընտանիքի բոլոր անդամները՝ խնդրելով լրագրողներին հարցը չսևեռել կոնկրետ Քոչարյան ընտանիքի վրա: 

«Ես Քոչարյանների ընտանքիի դեմ որևէ անձնական խնդիր չունեմ: Քոչարյանների ընտանիքն անձամբ ինձ որևէ բան չի արել, որ, Քոչարյանների ընտանիքի հետ կապված, անընդհատ խոսվում է: Ռոբրետ Քոչարյանը եղել է Հայաստանի Հանրապետության երկրորդ նախագահը, ունեցել է իր գործունեության ընթացքում, իհարկե, շատ նաև դրական գործեր, ներդրում ունեցել է, եղել է Արցախի Հանրապետության առաջին նախագահը, և ես՝ որպես սպա, որպես Ազգային անվտանգության ծառայող, որը ծառայել է այդ տարիներին, ես չեմ կարող որևէ անձնական կամ այլ-այլ բաներով խնդիրներ ունենամ այդ ընտանիքի հետ: Սա ծավալուն օպերատիվ և քննչական աշխատանքի արդյունք է, որոնց ամփոփումը եկել է նրան, որ կա հանցակազմ, և հարուցվել է քրեական գործ: Ես խնդրում եմ՝ մի անձնավորեք այդ հարցը»,- ամփոփեց Վանեցյանը: