Ցավոտ ա լինելու «աղքատներիս» ցասումը. միգուցե հե՞տ քայլեք. քաղաքացիների արձագանքը՝ Փաշինյանի գրառմանը

Վարչապետ Նիկոլ Փաշինյանի երեկվա ֆեյսբուքյան գրառումը բավականին բուռն քննարկումների առիթ է դարձել:

Վերջինս իր էջում դիմել էր հասարակությանը, թե՝ 

«Մի հարցրու միայն, թե ի՞նչ է արել կառավարությունը ինձ համար: Հարցրու նաև՝ թե իսկ ես ինքս ի՞նչ եմ արել ինձ համար»...

Հարկ է նկատել, որ վերջին շրջանում Փաշինյանի այսօրինակ հայտարարություններն ու գրառումները հաճախակի են դարձել: NEWSPRESS.am-ն արդեն անդրադարձել է խնդրին, թե ի՞նչը կլինի ընկած այս հայտարարությունների հիմքում: Չի բացառվում, որ Փաշինյանի «դերակատարումն» ավարտվել է և նա պետք է դուրս գա «խաղից»...

Անկեղծ ասած, եթե նա նման հայտարարություններ թողներ մի քանի ամիս առաջ, գուցե շատերը մտածեին, որ Փաշինյանի անունով կեղծ էջ է բացվել՝ նրա վարկանիշը գցելու համար: Սակայն այսօր իրավիճակը լրիվ այլ է՝ այն ոչ նախահեղափոխական է, ո՛չ հեխափոխական ու արդեն նույնիսկ ո՛չ էլ հետհեղափոխական...

Նախկինում գուցե Փաշինյանի նման ցանկացած հայտարարության ֆեյսբուքյան օգտատերերը դրական արձագանքեին, իսկ այսօր փոխվել է նաև արդեն «փոխված իրավիճակի» իրավիճակը...

Մի քանի մեկնաբանություններ մեջբերենք, որոնք գրառել են օգտատերերը.

Գոռիկ Գևորգյան. «Նիկոլ, քեզ անընդհատ հիշեցնելու եմ 2015 թվականի ձեր թիմի խայտառակ պարտությունը Վանաձորի ընտրություններում։ Այդ ժամանակ դու տղավարի քեզ պահեցիր ու ընդունեցիր, որ քո պարտության գլխավոր մեղավորը հենց դու ես։ Նույնիսկ ուզում էիր ՔՊ վարչության ղեկավարներին փոխել, այդ թվում՝ քեզ։ Իսկ հիմա, երբ կրկին պարտվում ես, փորձում ես հավայի կռուտիտներ անել, որոնք արդեն ձախողման դառը փորձ ունեն։ Սերժիկ-Ռոբիկ դուետը վկա»։

Ռոբերտ Ավագյան. «Բիձիկ, կիրակի առավոտ գիշերով յոռշ ես խմե՞լ, թե՞ ուռել ես: Մենակ-մենակ :)»:

Մաքս Վարշապետյան. «Ի սկզբանե ատամներով ձեզ պաշտպանել եմ ու ամեն օր կռիվ արել բոլորի հետ, անգամ հարազատ մարդկանց հետ ձեզ համար - հետևաբար, չփորձեք ինձ սերժական հանել:

Ես ` ամեն օր սոված ու ծարավ վճարել եմ հարկերս, սակայն մինչև հիմա աշխատում եմ հասարակական սեկտորում և օգնում եմ մարդկանց:

... Պետությունը բացահայտ ինձ ցույց ա տալիս, որ չի օգնելու, որ վախում ա ընդունի հակախտրականության օրենքը, որ ոչ կարամ դուրս գամ էս երկրից, ոչ էլ կարամ ստեղ հանգիստ ապրեմ:

Եվրոպային ներկայացնում եք, որ ապահով տեղ ա, մարդիկ իրար սիրում-հարգում են, գործը թափած, հնարավորությունները՝ լիքը: Ո՞ւմ եք խաբում ու խի՞ եք խաբում:

Բացի ձեր պոպուլիստական, ֆոբիաներով լի մտքերից, դեռ ոչինչ չեմ/չենք տեսել»:

Արսեն Վարդանյան. «Հեղափոխության առաջին օրերից պայքարել եմ՝ լցված հավատով, լավատեսությամբ: 

... քաղաքացին իր թիկունքում պիտի զգա պետության ուժն ու հոգածությունը, այլապես ավելորդ են դառնում կառավարությունը, Դուք... Սա ֆիդայական պետություն չէ, սա Հայաստանի Հանրապետությունն է՝ ազատ, անկախ ու արդար...

Բավակա՛ն է զոռ տաք պաթոսին, բավակա՛ն է Ձեր պերճախոս լեզվով կոծկեք ամեն բան, բավակա՛ն է միայն խոստումներ տաք: Մենք Ձեզ վստահել ենք, բայց այն, ինչ անում եք այժմ, քչերի սրտով է: Հուսախաբ մի՛ արեք մարդկանց, որոնք Ձեզ անվերապահորեն վստահել են, կամ էլ կարողացե՛ք արժանապատիվ հեռանալ...

Հ.Գ. Նախորդ իշխանությունը հանցախումբ էր, մեծավ մասամբ հղփացած տականքների խաժամուժ, իսկ Ձեր նշանակած տգետ, անպատրաստ, քծնող, դատարկամիտ կադրերը բոլորովին էլ նրանցից լավը չեն: Եվ ինչպես կասեր դասականը՝ սթափվե՛ք, գժուկնե՜ր...»:

Կրիստինա Ամիրյան. «Ինչո՞ւ չհարցնեմ. եթե ես արել եմ էդ կառավարության համար` ես, հարևան Ժորիկը, Պողոսը , Պետրոսը որ չանեինք կառավարության համար, հիմա Դավոս դուք չէիք գնա պ վարչապետ Ձեր տիկնոջ հետ։ Ով ինչ իր համար անում էր առաջ, շարունակելու է անել հիմա։ Թավշյա հեղափոխությունը միայն ձեր համար եղավ։ Հիմա եկել եք ու անամոթաբար աղքատությունը մեր գլխում ա` փոխվել մեզ է պետք ոչ կառավարությանը։

Ամոթ Ձեզ։ Մենակ հիշեք քայլելով բարձրանալը ավելի հեշտ է, քան գլորվելով հին տաշտակի առաջ հայտնվելը։ Ու գալու է էդ օրը ու ցավոտա լինելու «աղքատներիս» ցասումը։ Դուք էլ եք էքս դառնալու ու ավելի շուտ քան պատկերացնում եք` ձեր շրջագայությունների ցուցակը սեղմեք որ հասցնեք»։

Մարիամ Ավագյան. «Պ. վարչապետ ձեր ներշնչման դասընթացները չեն կշտացնում մարդկանց, ավելին, ադեկվատ մարդկանց նյարդայնացնում են, տպավորություն է, որ առաջ կառավարությունն էր մեղավոր, հիմա դուք եք կառավարում և դարձավ, որ մեզնից, ժողովրդից է, էտ դեպքում միգուցե ձեր անփորձ թիմով հետ քայլեք, փորձառուներին ձեր տեղը զիջեք, գոնե նրանք կուշտ են ու փորձառու, չէ որ ամբողջը մեզնից է կախված, անբաններիցս ու հեչ էական չի ով կլինի))))»...

Սմբատ Խանվելյան. «Աստվածաշնչում մի արտահայտություն կա. «Քո բերանով եմ դատելու քեզ», վարչապետ Նիկոլին դատելու է հեղափոխական Նիկոլը»..